Бүгүн Арассыыйаҕа Аҕа күнүн бэлиэтиибит. Аҕа күнүн көрсө биир дойдулаахтарбытыттан аҕаларын туһунан кэпсииллэригэр көрдөстүбүт.
Ньургуйаана Хорунова, Сыырдаах орто оскуолатын иитэр үлэҕэ мэтэдьииһэ:
– Аҕам Семён Гаврильевич Черкашин бэйэтин кынаттаах үлэтинэн киһи бу олоххо куруук иннин диэки баран иһиэхтээҕин, идэтин ис дууһаттан таптыахтааҕын өйдөппүтэ. Ону тэҥэ, уустук кэмнэргэ да санааны түһэрбэккэ, дьоҥҥо-сэргэҕэ, дьиэ кэргэҥҥэ куруук эрэллээх тирэх буоларга үөрэппитэ. Аҕабыт олорбут олоҕо барыта дьиҥнээх үлэһит киһи уонна бэриниилээх кэргэн, аҕа үрдүк холобура буолар. Кини хас эмэ сыл устата “Лена”,”Сардаҥа” уонна “Сыырдаах” сопхуостарга “Чемпион комбайнер” аатын чиэстээхтик ылан, оройуоҥҥа, республикаҕа биллибитэ. Москваҕа ВДНХ быыстапкатыгар тиийэ бэйэтин үлэтин таһымын көрдөрбүтэ. Кини салайбыт сиэмэ үүннэрэр звенота оройуоҥҥа куруук маҥнайгы миэстэлэри ылара, бэйэтэ улуус баһылыктарын үрдүк наҕараадаларын, СӨ вице-президенин А.К. Акимов уонна тыа хаһаайыстыбатын миниистирин Р.Г. Дмитриев үрүҥ көмүс анал бэлиэлэрин чиэстээхтик ылбыта
Светлана Бурцева, улуустааҕы социальнай кэлим киин стационарнай отделениетын сэбиэдиссэйэ:
– Мин аҕам Сергеев Михаил Петрович үлэни өрө тутарга, олоҕу сыаналыырга үөрэппитэ. Кини табаҕы тардыбат, арыгыны испэт чөл олохтоох киһи этэ. Сүрдээх бүгүрү, барыны бары сатыыра. Аҕа, кэргэн быһыытынан олус кыһамньылааҕа, сытыары-сымнаҕас майгылааҕа. Киниттэн мөҕүллүбүппүн олох өйдөөбөппүн. Эдэр эрдэҕинэ кыанар буолан, Томмот суолун тутуутугар үлэлээбитэ. Аҕа дойду Улуу сэриитигэр пулеметчик этэ, тыыл, сэрии бэтэрээнэ. Сэрии кэнниттэн саҥа олоҕу тутуспута. Холкуос, сопхуос хара үлэтигэр кыаҕа баарынан үлэлээбитэ.
Зоя Данилова, улуустааҕы киин библиотека справочнай-библиографическай отделын сэбиэдиссэйэ:
– Аҕам Иван Николаевич Данилов Саха АССР үтүөлээх учуутала. Улууспут үөрэхтээһинин сайдыытыгар олоҕун бүтүннүү анаабыта. Комсомолга үлэлээбитэ, учууталлаабыта, дириэктэрдээбитэ, улуус үөрэҕин управлениетын, улуус үөрэхтээһинин идэлээх сойууһун, улуус Ытык сүбэтин салайбыта. Аҕам биһигини бэйэтин тус холобурунан ииппитэ. Кини дьоҥҥо үтүө сыһыаннаах, боростуой, аламаҕай этэ. Дьиэ кэргэҥнэ сылаас сыһыаҥҥа, айылҕаны таптыырга, эппиэтинэстээх буоларга, дьиэ ис-тас үлэтиттэн саҕалаан, үлэ үөрүйэхтэригэр барытыгар үөрэппитэ. Кыра эрдэхпититтэн батыһыннаран, кэлин да айылҕаҕа сир астыырбыт, мууспутун ыларбыт, илим үтэрбит, оттуурбут, дьиэ таһыгар элбэх оҕуруот аһын, үүнээйи олордорбут. Кини сир асчыт, оҕуруоччут бастыҥа этэ. Улууска юннатскай станцияны тэрийбитэ. Миигин «кинигэни кытта кэпсэтэр үлэни талбыккыттан үөрэбин» диирэ. Оскуола кэнниттэн Кемерово куоракка үөрэххэ киирэрбэр барсан, сирдээн, мииҥҥэ тиийэ буһаран, аһатан, өйөбүл буолбута. Онно төрөөбүт күнүм буолбутугар гладиолус сибэкки дьөрбөтүн бэлэхтээбитин истиҥник саныыбын. Аҕам аттыбар баара, бииргэ олорбут кэммит миэхэ өрүү күндү, сылаас. Аҕабар махталым муҥура суох. Аҕам куруук: «Дьон тэҥэ сылдьыҥ, киһи тыыннаах эрдэҕинэ хамсаныахтаах, сыттыҥ да бүтэҕин, олох диэн – хамсаныы, дуоһунас диэн бүгүн баар, сарсын суох, дьону кытта эйэлээх буолуҥ» – диирэ.
Екатерина Захарова, Мария Аргунова