Россия Үлэҕэ Дьоруойа, Үлэ Албан аата уордьан толору кавалера Михаил Николаевич Готовцев 80 сааһынан ыанньыксыттарга улуустааҕы күрэс биллэриннэ. Бу туһунан улуус баһылыга Василий Алексеев атырдьах ыйын 7 күнүнээҕи 491 №-дээх дьаһала тахсыбыта.
Күрэс Байаҕантай нэһилиэгэр Үлэ Дьоруойа Михаил Готовцев “Удьуор” бааһынай-фермерскэй хаһаайыстыбатын базатыгар Убаһалаахха атырдьах ыйын 25 күнүгэр буолуоҕа. Манна Уус Алдан нэһилиэктэриттэн тыа хаһаайыстыбатын бородууксуйатын оҥорон таһаарар кооперативтар, бааһынай-фермерскэй хаһаайыстыбалар уонна ынах сүөһүнү иитэр хаһаайыстыбалаах урбаанньыттар ыанньыксыттара кыттыахтара.
Теорияны тургутуу, санитарнай бэлэмнэнии, ынаҕы ыыр аппарааты ыһыы уонна таҥыы, ыырга бэлэмнэнии уонна ыам дьайыытын, гигиенатын уонна култууратын көрүү курдук түөрт түһүмэхтээх күрэс сыала-соруга ынаҕы ыыр аппараат оператордарын идэлэрин сырдатыы, уопут атастаһыыта, үлэ хаачыстыбатын үрдэтии, ынаҕы ыыр култуураны сайыннарыы буолар.
Кыттааччылар санитарнай киниискэлээх, анал үлэлиир таҥастаах буолаллара ирдэнэр.
Күрэс түмүгүнэн тоҕус киһиттэн састааптаах дьүүллүүр сүбэ муҥутуур кыайыылааҕы уонна 45 саастарыгар диэри, 45 саастарыттан үөһээ биирдии бастыҥы быһаарыахтара.
Күрэскэ кыттыан баҕалаахтар сайаапканы Уус Алдан улууһун тыа хаһаайыстыбатыгар управлениетын электроннай почтатыгар borusx@mail.ru атырдьах ыйын 15 күнүгэр диэри ыыта охсоргут ирдэнэр. Билсэр нүөмэргит: 89659934434 (Аммосова Марина Виссарионовна).
Хаартыска редакция архыыбыттан