Улууспут дьоно-сэргэтэ бүгүн Арассыыйа Дьоруойун Александр Находкины В.В. Никифоров аатынан «Тойон Мүрү» култуура дыбарыаһыгар уруйдуу көрүстүлэр.
Улуус баһылыга Василий Алексеев Александр Находкин бойобуой суолун, хорсун быһыыларын билиһиннэрдэ, кини биһиги улууспут Тумул бөһүөлэгиттэн сыдьааннаах буоларынан киэн туттан туран улуус олохтоохторун ааттарыттан биэҕэ сэртипикээти бэлэх уунна. Итиэннэ эҕэрдэ тылы улуус депутаттарын Сэбиэтин бэрэссэдээтэлэ Иннокентий Аммосов, байыаннай дьайыы кыттыылаахтарын улуустааҕы түмсүүтүн бэрэссэдээтэлэ Андрей Карпов эҕэрдэлээтилэр.
Салгыы Бороҕон нэһилиэгин баһылыга Константин Копырин Арассыыйа Дьоруойун удьуор төрүттэрин, аймахтарын туһунан кэпсээтэ. Онтон улуус оҕолорун ааттарыттан Мүрү 1-гы №-дээх орто оскуолатын 10-с кылааһын үөрэнээччитэ, «Мүрү» байыаннай кулууп хамандыыра Евгений Бочкарев, Майаҕас орто оскуолатын 7-с кылааһын үөрэнээччитэ, «Өркөн» оҕону эбии үөрэхтээһин киинин иитиллээччитэ Сандаара Ушницкая киэн туттар тылларын анаан туран оҕолор илиилэринэн оҥорбут олоҥхо бухатыырын бэлэх ууннулар.
Дьоро күнү дойдуга таптал уонна эрдээх санаа туһунан ылбаҕай ырыаларынан Екатерина Готовцева, Иван Прибылых, Петр Кычкин киэргэттилэр.
Александр Находкин харда тылыгар Уус Алдан улууһун дьонугар истиҥник көрсүбүттэрин иһин махтанна. Уус Алдан улууһа аҕатын Александр Федорович, кини быраатын Егор Федорович төрүт дойдулара буоларын туһунан этэн туран оҕо сааһыгар Тумулга элбэхтик сылдьыбытын, култуура дыбарыаһын саалатыгар кини элбэхтик ыалдьыттаабыт аймаҕа СӨ үтүөлээх бырааһа Варвара Находкина баарын туһунан эттэ. Итиэннэ Арассыыйа Дьоруойун аатын эппиэтинэһин өйдөөн туран чиэстээхтик ылынарын, дойдубут туһугар, ордук үүнэр көлүөнэни иитиигэ туһалааҕы оҥоруом диэн мэктиэ тылын эттэ. Кини ордук оҕолор чиэстииллэриттэн үөрэрин, бу үүнэр көлүөнэҕэ дойдуга бэриниилээх буолуу тыынын иҥэрэрин туһунан этэн улуус баһылыгар ыҥырыытын иһин махтанна.
Мария Аргунова