Кулун тутар 31 күнүттэн муус устар 2 күнүгэр диэри Дьокуускай куорат өрөспүүбүлүкэ саамай көхтөөх, эрчимнээх эдэр ыччатын түмпүт киинигэр кубулуйда. Манна эдэр саас эрчимин уонна талаанын холбообут «Бастыҥнар бииргэ» өрөспүүбүлүкэтэҕи таһымнаах слёт үрдүк тэрээһиннээхтик ыытылынна.
Биһиги улууспут чиэһин Мындаабатааҕы спортивнай оскуола первичнай салаатын иһинэн тэриллибит «Тэтим» оҕо хамсааһына ситиһиилээхтик көмүскээтэ. Үс күннээх тэрээһин биир тыыннаах, олус интэриэһинэйдик ааста.
Программа ис хоһооно олус баай: айар дьоҕуру уонна биир сомоҕо буолууну бэрэбиэркэлиир куонкурстар, станцияларынан оонньуулар; инникитин туһалаах буолар саҥа сатабыллары биэрэр практическай дьарыктар.
Биһиги активистарбыт үрдүк бэлэмнээхтэрин уонна түмсүүлээхтэрин көрдөрөн, хас да хайысханан бочуоттаах миэстэлэргэ тигистилэр: визитка күрэһигэр – 2-с миэстэ; алтыһыы күрэһигэр – 2-с миэстэ; сааланы кытта оонньуу күрэһигэр – 3-с миэстэ.
Түмүккэ «Тэтим» хамаанда уопсай зачекка бочуоттаах III миэстэни ылла.
Кыайыылаахтары бэлэмнээбит салайааччыларбытыгар: «Бастыҥнар хамсааһыннара» улуустааҕы тэриллии бэрэссэдээтэлигэр Айыына Бережноваҕа уонна иитии үлэтигэр дириэктэр сүбэһитэ Мария Готовцеваҕа улахан махталбытын тириэрдэбит. Оҕолорбутун чаҕылхай кыайыыгытынан эҕэрдэлиибит! Инникитин да ситиһиилэртэн ситиһиигэ дабайа туруҥ, куруук бастакы буолуҥ уонна саамай хорсун былааннаргытын олоххо киллэриҥ!
Марина Жиркова, оҕо уонна ыччат «Бастыҥнар хамсааһыннара» улуустааҕы тэриллии исписэлииһэ