Уус Алдан улууһун Байаҕантай нэһилиэгин киэн туттуута буолбут Тандатааҕы история-архитектура музейы төрүттээччи, РСФСР уонна Саха АССР оскуолаларын үтүөлээх учуутала, Саха АССР култууратын үтүөлээх үлэһитэ, Үлэ Кыһыл Знамята орден кавалера Иван Павлович Готовцев олоҕун, айымньылаах үлэтин толору сырдатар «Үлэҕэ анаммыт олох» диэн кинигэ күн сирин көрдө.
Кинигэҕэ И.П. Готовцев бэйэтэ суруйбут ыстатыйалара, бииргэ алтыспыт үөлээннээхтэрин ахтыылара, киниэхэ анаммыт хоһооннор киирбиттэр. Кинигэ маассабай-бэлитиичэскэй таһаарыы быһыытынан Иван Павлович төрөөбүтэ 110 сылыгар уонна Саха Өрөспүүбүлүкэтигэр Култуура сылыгар ананан 100 ахсаанынан Дьокуускай куоракка «Дани-Алмас» хампаанньаҕа бэчээттэнэн таҕыста. Кинигэ ааптара суруналыыс, СӨ культуратын туйгуна Ефросиния Константиновна Колодезникова – бука бары дириҥник ытыктыыр киһибит этэ, Танда музейын фондатын харааннааччынан, музееведынан олоҕун тиһэх күннэригэр диэри үлэлээбитэ.
Кинигэ аан тылыгар Иван Павлович чугас аймахтара кини сааһын тухары биир да күн өрөөбөккө, илиитин араарбакка үлэлээн төрөөбүт нэһилиэгэр, Уус Алдан улууһугар, бүтүн Саха сиригэр уһун үйэлээх үтүө бэлэҕи оҥорон хаалларбытын киэн тутта бэлиэтээбиттэр. Бу баай ис хоһоонноох кинигэҕэ олоҕун олуктара, үлэтин үктэллэрэ, наҕараадалара киирбиттэрэ тоҕоостоох.
Бастакы түһүмэх «Кэм кэрэһитэ» диэн ааттаммыт. Манна дьоһун миэстэни Иван Павлович бэйэтэ суруйбут ыстатыйалара ылаллар. Байаҕантай нэһилиэгин былыргытын, Тандаҕа олорон ааспыт судаарыскайдар олохторун, үлэлэрин, сэбиэскэй былаас олохтонуутун, Гражданскай сэрии ыарахан кэмнэрин туһунан ыстатыйалар ааҕааччы болҕомтотун тардыахтара. Иван Павлович аймах-билэ дьонун хаартыскалара, аҕатынан, ийэтинэн аймахтарын төрүччүлэрэ, илиитинэн суруйбут автобиографията, тус докумуоннара кини олоҕун туһунан киэҥник сырдаталлар, кинигэни сылаас-сырдык тыынныыллар.
«Музей кини кэхтибэт кэриэһэ» диэн ааттаммыт иккис түһүмэххэ Иван Павлович Готовцев чугас аймахтарын уонна кинини кытта бииргэ алтыспыт дьон ахтыылара, суруктара, ыстатыйалара айымньылаах үлэ ымпыгын-чымпыгын туһунан сиһилии кэпсииллэр, үтүө үлэһит киһи туһунан толору сырдаталлар.
Кинигэҕэ Ефросиния Константиновна ахтыылара ураты миэстэни ылаллар. Кини музей диэн дьикти эйгэни ис-иһиттэн дириҥник билэр буолан, ыытыллар үлэ ис хоһоонун, сүрүн хайысхаларын сиһилии сырдаппыт.
Үһүс түһүмэх «Эн музейыҥ – эн хорсун быһыыҥ» диэн ааттаммыт. Бу түһүмэххэ Танда мусуойугар сылдьыбыт дьон бастыҥ баҕа санааларын тиспит суруктарын, ону таһынан саха суруйааччылара киниэхэ анаан, сөҕөн-махтайан суруйбут, айбыт хоһооннорун киһи долгуйа, кэрэхсии ааҕар.
Кинигэҕэ кэм ирдэбилинэн Иван Павлович тус олоҕун, үлэтин туһунан эбии матырыйааллары куйаар ситимигэр сайтка киирэн көрөргө анаан кюар-код киирбитэ кэрэхсэбиллээх.
«Киһи икки үйэлээх: бастакыта – бэйэтэ тыыннаах сылдьарын тухары, иккиһэ – кинини билэр, өйдүүр дьон баалларын тухары» диэн бэргэн этии баар. Иван Павлович Готовцев күн бүгүн кэм кэрэһитэ буолан, аатыран-сураҕыран турар мусуойу төрүттээн, төрөөбүт нэһилиэгэр, улууһугар, бүтүн Саха сиригэр уһун
үйэлээх үтүө бэлэҕи оҥорон хаалларбыт үтүөтэ хаһан да умнуллубатын, бу кинигэ ытык киһибит олоҕун, үлэтин туһунан уһун сылларга умнуллубат, өлбөт-сүппэт үйэлээх өйдөбүл буоллун!
И.П. Готовцев аатынан Тандатааҕы историяны, кыраайы үөрэтэр музей иһитиннэриитэ