Бүгүн Уус Алдан улууһугар «Биир ньыгыл Россия» партия Уус Алданнааҕы салаатын «Түмүк баар!» («Есть результат!») отчуоттуур-программнай форума күн устата араас тиэмэлээх алта былаһаакканан киэҥ хабааннаахтык үлэлиир.
Форуму үөрүүлээх быһыыга-майгыга арыйыы чааһа күн иккис аҥаарыгар В.В. Никифоров-Күлүмнүүр аатынан «Тойон Мүрү» култуура дыбарыаһыгар буолуоҕа, онтон эбиэт иннинэ үлэлээбит былаһааккалар эппиэттээхтэрэ отчуоттарын туруоруохтара.
Бүгүҥҥү форум тэрээһиннэригэр «Биир ньыгыл Россия» Бүтүн Россиятааҕы политическай партия Саха сиринээҕи региональнай салаатын сэкирэтээрин солбуйааччы Иван Луцкан, СӨ Судаарыстыбаннай Мунньаҕын (Ил Түмэн) депутата Геннадий Васильев, о.д.а. кыттыахтара.
«Куттала суох суоллар» уонна «Куорат эйгэтэ» былаһааккаҕа улуус нэһилиэктэрин баһылыктара «Дьону тыа сиригэр олохсутуу», «Нэһилиэк иһинээҕи суолу оҥоруу», «Тыа сирин сайдыытыгар саҥа сүүрээннэри киллэрии» тиэмэлэринэн үлэлээтилэр.
Былаһаакканы капитальнай тутуу отделын салайааччыта Максим Гуляев салайда. Үлэ түмүгүнэн этиллибит санаалар, идиэйэлэр олоххо киирэргэ олук буолуохтара.
Партия «История өйдөбүнньүгэ» бырайыагын чэрчитинэн «Уус Алдан оройуона төрүттэммитэ 100 сылын концепцията: былааннар, соруктар уонна олоххо киллэрии суоллара» тиэмэлээх былаһаакка Сэһэн Ардьакыап аатынан Уус Алданнааҕы историяны, кыраайы үөрэтэр түмэлгэ тэрилиннэ.
Былаһаакка үлэтин модератор Иван Колодезников саҕалаата, онтон «История өйдөбүнньүгэ» федеральнай партийнай бырайыак туһунан регионнааҕы координатор Саргылана Неустроева, Уус Алдан улууһугар историяны харааннааһыҥҥа, патриотическай иитиигэ туһуламмыт олоххо киирбит федеральнай бырайыактары түмэл дириэктэрэ Оксана Прядезникова билиһиннэрдилэр. Уус Алдан оройуона төрүттэммитэ 100 сыллааҕы үбүлүөйүн тэрийэр хамыыһыйа эппиэттээх сэкирэтээрэ Иван Колодезников үбүлүөйү тэрээһиннээхтик ыытыыга туһуламмыт Концепция туһунан кэпсээтэ, ону таһынан үөрэх тэрилтэлэригэр «Оскуола музейа» Бүтүн Россиятааҕы бырайыагы олоххо киллэрии хаамыытын Уус Алдан улууһун үөрэх управлениетыттан иитии үлэтигэр уонна эбии үөрэхтээһиҥҥэ специалиһа Саина Портнягина дакылаат оҥордо.
«Народная программа 2.0» федеральнай бырайыагынан үөрэхтээһин эйгэтигэр 2019 сылтан ыытыллар үлэни-хамнаһы бүгүн үөрэх улуустааҕы управлениетыгар тэриллибит «Саҥа оскуола» былаһааккаҕа ырытыһаллар, инники былааннары торумнууллар.
Былаһаакка модератора үөрэх управлениетын начаалынньыгын солбуйааччы Тимофей Григорьев федеральнай бырайыагы билиһиннэриитин, «СӨ Үөрэхтээһини сайыннарыыны хааччыйар ресурснай киин» ГКУ дириэктэрэ Албан Стрекаловскай тыл этиитин, үөрэх улуустааҕы управлениетын начаалынньыга Федор Татаринов «Үөрэхтээһин аныгы эйгэтэ: «Биир ньыгыл Россия» партия туруктаах сайдыыга туһуламмыт бырайыактара» тиэмэлээх дакылаатын кэнниттэн «Народная программа 2.0» партийнай бырайыакка киириэн сөптөөх этиилэри оҥорууга бөлөхтөрүнэн үлэ саҕаланна.
Бу былаһааккаҕа улуус оскуолаларын дириэктэрдэрэ, оҕо саадтарын сэбиэдиссэйдэрэ уонна үөрэх кыһаларын кэлэктииптэрин идэлээх сойууустарын кэмитиэттэрин бэрэссэдээтэллэрэ кытталлар.
Отчуоттуур-программнай форум алта былаһааккатыттан биирдэстэрэ улууска дьахтар хамсааһыныгар ананна.
Былаһааккаҕа Уус Алдан улууһугар «Биир ньыгыл Россия» партия салаатын дьахтар хамсааһынын (салайааччы Евгения Аргунова) чилиэттэрэ, улуус дьахталларын түмсүүлэрэ, общественниктар, тэрилтэ үлэһиттэрэ, бэйэ дьыалатынан дьарыктанар кэрэ аҥаардар кыттыыны ыллылар.
Ханнык да кэмҥэ дьахтар, ийэ киһи олоҕу хамсатар сүрүн күүс буоларын, маны тэҥэ доруобуй, чөл буолуу, общественник, предприниматель дьахтар сайдар суолун тула кэпсэтии таҕыста.
«Инникибит чөл буолуута» – өссө биир улахан былаһаакка үлэтэ улуус доруобуйа харыстабылын салаатыгар ананна. Манна диспансеризация боппуруоһугар эрдэттэн сэрэтии үлэтин тэрээһиннээхтик ыытыы соругун тула лекция ыытылынна.
«Дойдубут култуурата» былаһааккаҕа тыа сирин кулууптарын модернизациялааһын боппуруостара, федеральнай бырайыактарга, граннарга кыттыы тула кэпсэтии, санаа үллэстиитэ тэрилиннэ.
Былаһааккалар олох-дьаһах сүрүн хайысхаларын хабан, инники үлэ тэрээһиннээхтик, саҥа таһымҥа барарын туһугар санаалары, сонун көрүүлэри түмтүлэр.