Бүгүн улуус баһылыгын бастакы солбуйааччы Семен Бурнашев 2026 сылга сааскы халааҥҥа уонна тыа баһаардара тахсыан сөптөөх кэмҥэ толору бэлэмнээх буоларга тустаах биэдэмистибэлэр икки ардыларыгар оперативнай мунньаҕы тэрийдэ. Мунньахха Уус Алдан прокурорун солбуйааччы Т.С. Аргунов кытынна, ону тэҥэ нэһилиэктэр баһылыктара быһа холбонуунан, тэрилтэлэр салайааччылара кытыннылар.
Семен Бурнашев – сааскы халааҥҥа, оттон баһаар тахсыан сөптөөх кутталлаах кэмҥэ бэлэмнэнии туһунан Уус Алданнааҕы лесничество салайааччытын солбуйааччы Николай До, “Якутлесресурс” ГАУ Уус Алданнааҕы филиалын дириэктэрэ Ньургун Бурнашев уонна Бэрт Ууһун нэһилиэгин баһылыга Илья Ильин иһитиннэриилэри оҥордулар.
Уус Алдан улууһугар улахан уу кэлэр кэлэр түгэнигэр алта нэһилиэнньэлээх пууҥҥа куттал суоһуур: Өлүөнэ өрүскэ – Оҕуруоттаах (Суотту), Хоноҕор, Арыы Тиит, Алдан өрүскэ – Дыгдаал, Чэриктэй, Кылаайы.
Бу нэһилиэнньэлээх пууннарга 13 социальнай суолталаах эбийиэк, 4 хочуолунай, 10 трансформаторнай подстанция, 516 олорор дьиэ уу ылыан сөптөөх сиргэ тураллар, онуоха бу дьиэлэргэ олорооччу ахсаана – 2690 киһи (о.и. 260 оҕо).
Уу ылар түгэнигэр барыта 360 киһини хабар быстах кэмҥэ олордор 11 пуун тэриллэр: Оҕуруоттаахха 50 киһиэхэ “Эрэл” спортсаала, Хоноҕорго 30 киһиэхэ Уус Алданнааҕы техникум, Арыы Тиит олохтоохторуттан 30 киһиэхэ Тумул орто оскуолата уонна 15 киһиэхэ Арыы Тииттээҕи оскуола-саад, Дыгдаал олохтоохторуттан 35 киһиэхэ “Өспөхтөөҕү “Сайдам” КСК-гар уонна 60 киһиэхэ Лөгөйдөөҕү лицей-интернакка, Чэриктэйтэн 50 киһиэхэ Чэриктэй орто оскуолатыгар уонна 40 киһиэхэ Дүпсүн орто оскуолатын интернатыгар, Кылаайыга 20-лии киһиэхэ Түүлээх орто оскуолатыгар, оҕо саадыгар уонна 10 киһиэхэ Түүлээх балыыһатыгар куойка-миэстэлэри бэлэмниэхтэрэ. Ону таһынан 1379 ынах сүөһүнү уонна 1539 сылгыны быстах туруорарга анаан эмиэ 11 пуун бэлэм.
Ити курдук СӨ Бырабыыталыстыбатын 2026 с. тохсунньу 13 күнүнээҕи 5-р №-дээх дьаһалынан бары ирдэбил толоруллар, үлэ барар. Бу үлэлэргэ улуус дьаһалтата бюджеттан 1 мөл. солкуобайы көрбүт.
Оттон баһаар тахсыан сөптөөх кутталлаах кэмҥэ бэлэмнэниигэ былаан оҥоһуллан бигэргэнэн, билигин баһаар тахсар түгэнигэр умуруорууга 218 киһи, 25 бөлөх, 59 единица техника бэлэм. Быйылгы былааҥҥа 27,12 км уһуннаах минерализованнай балаһаны, баһаары утары 19,04 км уһуннаах хаһыыны саҥардыы үлэтэ баар, онуоха билиҥҥитэ 968 159 солкуобай көрүллүбүт. Дүпсүн нэһилиэгиттэн Бээдигэ, Курбуһах нэһилиэгиттэн Окоемовкаҕа, Баатаҕай нэһилиэгиттэн, Лөгөй нэһилиэгиттэн Даалыга, Хомустаахха бу хайысхаҕа төһө-туох үлэ ыытыллыахтааҕар иһитиннэрии киирэ илигэ ыйылынна. Ону таһынан Бороҕоҥҥо (Мүрү), Оҕуруоттаахха (Суотту), Хоноҕорго уонна Уһун Күөлгэ баһаары утары тастан уунан хааччыллыыга итэҕэстэр бааллара этилиннэ.
Мунньах кэмигэр кэпсэтиигэ, түмүк этиигэ баһылык бастакы солбуйааччыта бары тустаах салайааччылар бу икки хайысхаҕа болҕомтону күүһүрдэллэригэр, үлэни эппиэтинэстээхтик тэрийэллэригэр, ирдэбили барытын толороллоругар ыйда.