«Хотугу кустук» («Радуга Севера») быыстапка Саха сирин эдэр маастардарын үлэлэрин муус устар 1 күнүгэр Дьокуускай куорат Ф.И. Авдеева аатынан Оҕо айымньытын киинигэр түмтэ. 39-с төгүлүн ыытыллар быыстапка Арассыыйаҕа Норуоттар сомоҕолоһууларын, Саха сиригэр Култуура сылын чэрчитинэн ыытылынна.
Быыстапкаҕа өрөспүүбүлүкэ 21 улууһуттан, ол иһигэр Арктика уонна Дьокуускай куорат үөрэнээччилэрин үлэлэрин сыаналаатылар.
Тэрийээччилэринэн Саха сирин Үөрэхтээһиҥҥэ уонна наукаҕа министерствота, «Юные Якутяне» республикатааҕы ресурснай киин буоллулар.
Үөрүүлээх аһыллыы сиэригэр-туомугар тэрийээччилэр ааттарыттан «Юные Якутяне» киин директорын солбуйааччы Екатерина Сокольникова, экспердэр ааттарыттан Арктикатааҕы култуура уонна ускуустуба судаарыстыбаннай институтун дизайн уонна декоративнай-прикладной ускуустуба кафедратыттан Никита Васильев тыл эттилэр.
Күн устата экспердэр бары хайысхаларынан бастыҥ үлэлэри таллылар. Бу үлэлэр «Наследник традиций» норуот культуратын оҕо бүтүн Россиятааҕы фестивалыгар кыттар чиэскэ тигистилэр.
Биһиги оскуолабытыттан сэттэ үлэ араас хайысхаҕа кытынна: 8-с кылаас үөрэнээччитэ Алеша Лаптев «Роспись (стекло, дерево, кожа)» хайысхаҕа 1-кы миэстэ буолла. Онон салайааччыта Я.И. Терентьева «Наследники традиций» фестивальга иккис сылын кыттар чиэскэ тигистэ; «Бисер» хайысхаҕа А.Карина, А.Ньургустаана, П.Виалетта, П. Таня 3-с миэстэ буоллулар (салайааччылара: Н.В. Тимофеева, А.М. Громова, Д.П. Сивцева).
Оҕолорго уонна салайааччыларга ситиһиилэри, айымньылаах үлэни баҕарабыт.
Орто Эбэ анал интернат оскуолатын «Сырдат» пресс киинэ