Уус Алдан райПО-гар 40 сыл таптыыр идэтинэн үтүө суобастаахтык үлэлээбит үлэ бэтэрээнэ, РФ потребкооперациятын туйгуна, СӨ потребкооперациятын бочуоттаах үлэһитэ, «Гражданскай килбиэн» бэлиэ хаһаайката, Мүрү нэһилиэгин олохтооҕо Мария Колодезникова дууһатын иэйиитин холустаҕа түһэрбит бииртэн-биир киһи сөҕөр хартыыналара Сэһэн Ардьакыап аатынан улуустааҕы музейга быыстапкаҕа турдулар.
Быыстапка аһыллыытын тэрээһинин салайан ыытааччы музей методиһа Маргарита Крылова Мария Петровнаны кыһыл дорожканан хаамтаран киллэрбитин дьоҕус сааланы толору мустубут дьон ытыс тыаһынан көрүстүлэр. Үһүс саас оскуолатын иһинэн үлэлиир «Сиккиэр» инструментальнай ансаамбыл (сал. Станислав Луковцев) композитор Афанасий Моргусов «Оһуор» инструментальнай айымньытын толоруутунан саҕаланна. Бу ансаамбылга Мария Петровна уонтан тахса сыл дьарыктанан, ансаамбыл тутаах оонньооччута буолбут. Онон бүгүн мустубут дьон Мария Петровна уруһуйдуурун таһынан балалайкаҕа оонньуурун арыйдылар.
Салгыы Мария Петровна иис үлэлэрин билиһиннэрдэ. Дьахтар сахалыы соно, кыбытык тигиилэрэ, олбохторо, туостан оҥоһуктара дьон болҕомтотун тартылар. Сонун түгэнинэн Мария Петровна уруһуйдаабыт хартыыналарын билиһиннэриитэ буолла. Кини араас таһымнаах куонкурустарга Гран-при иккитэ ылан турар, лауреат аатын хаста да сүкпүтэ. Биир хартыыната Москваҕа Третьяковскай галереяҕа турбута. Уруһуйга үөрэппит учуутала Сусанна Аммосова, «Кустук» изостудия салайааччыта Светлана Мухина, балалайкаҕа үөрэппит Станислав Луковцев, хомуска уһуйбут Лия Слепцова истиҥ эҕэрдэлэриттэн саҕалаан райПО-ҕа бииргэ үлэлээбиттэрэ, «Өркөн» оҕону эбии үөрэхтээһин киинин педагогтара, бииргэ төрөөбүттэрин кытта төрөппүт кыыһа, Мүрү нэһилиэгин баһылыгын солбуйааччы Вероника Сивцева, улууспутугар Үһүс саас оскуолатын салайааччыта Матрена Готовцева, Мүрү нэһилиэгин Үһүс саас оскуолатын салайааччыта Варвара Гоголева, оскуолаҕа бииргэ үөрэммиттэрэ, о.д.а. эҕэрдэ эриэккэһин эттилэр.
Мария Колодезникова үлэһитэ, дьоҥҥо үтүө сыһыана, дьоҕура барыта чаҕылхайдык арылынна. Кини сатаабата суох, иистэнэр, уруһуйдуур, хоһоон айар, саахыматтыыр, онтон да атын дьарыктаах. Маннык кэрэ дьахтар, ийэ, эбэ олоҕу киэргэтэ, сырдыгы саҕа сылдьар.
Быыстапка улуустааҕы музейга икки нэдиэлэ туруоҕа. Мүрү олохтоохторо, ыалдьыттар, үөрэнээччилэр Мария Колодезникова ураты кэрэ хартыыналарын көрөргүтүгэр ыҥырабын.
Елена Сыроватская, уопсас. кэрэсп.