Быйыл өрөспүүбүлүкэ үрдүнэн Култуура сыла биллэриллэн, бары хайысхаттан култуура салаатын үлэһиттэрин түмэр улахан форум ыытыллан, үлэ былааннара торумнаммыттара. Бу эппиэттээх сылга улуус култууратын салаатын саҥа салайааччы, ол гынан баран бу эйгэҕэ балай да уһуннук үлэлээбит, уопуттаах Эльза Киренская салайан сирдиэҕэ. Эльза Михайловна быйылгы үлэ былаанын, улахан тэрээһиннэрин билиһиннэрдэ уонна улуус култууратын сайдыытын тула бэйэтин санаатын сэгэттэ.
– Улууска олунньуга култуура бэтэрээннэрэ, үлэһиттэрэ, нэһилиэк култуура кииннэрин кэлэктииптэрэ кыттыылаах Култуура сылын үөрүүлээх арыллыытын тэрээһинэ 300-тэн тахса кыттааччылаах буолан ааста. Маны сэргэ Уус Алдан оройуона тэриллибитэ 100 сылыгар анаммыт нэһилиэктэр уус-уран самодеятельностарын фестивала түмүктэннэ. Быйылгы фестиваль уратыта диэн, урукку сылларга быыстапкалары тэрийэр буоллахпытына, быйыл бибилэтиэкэ үлэһиттэрэ архыып чахчыларыгар олоҕуран, 1930 сылтан 1954 сылга диэри нэһилиэктэрин устуоруйатын кэпсиир тиэмэлэринэн НПК-ҕа кытыннылар. Бу матырыйааллар түмүллэн, оройуон тэриллиитин туһунан улахан кинигэ тахсыытыгар киириэхтээхтэр, туһаныллыахтаахтар.
Саҥа сылга киирэн баран улахан ситиһиибитинэн үс федеральнай бырайыакка кыайыылаах тахсан, нэһилиэк кулууптара материальнай-техническэй баазаларын хаҥатыахтара. Ол курдук «Семейные ценности и инфраструктура культуры» федеральнай бырайыагынан Бүтүн Россиятааҕы куонкуруска Бэйдиҥэтээҕи норуот айымньытын киинэ кыайыылаах тахсан, култуура тэрилтэлэрин модернизациятыгар 3 мөл. солк. суумалаах субсидия көрүллэн, өрөмүөн үлэтэ ыытыллыаҕа. Эмиэ федеральнай бырайыагынан «Материальнай-техническэй баазаны сайыннарыы уонна бөҕөргөтүү» салааҕа Тулуна сынньалаҥ киинэ 1,5 мөл. солк. суумалаах субсидиянан светодиоднай ЛЕД-экран, Суоттутааҕы сынньалаҥ киинэ 686 тыһ. солк. суумаҕа свето-музыкальнай аппаратура ылыахтара. Маны тэҥэ «Бастыҥ үлэлээх кэлэктиибинэн» Найахы сынньалаҥ киинэ уонна «Бастыҥ култуура үлэһитинэн» Кэптэни сынньалаҥ киинин методиһа Вера Сыроватская ааттаннылар.
Култуура сылыгар сүрүн үлэбитин култуура дьиэлэрин, кииннэрин модернизациятыгар, тупсарыыга туһулаатыбыт. Ол чэрчитинэн култуура тэрилтэлэрэ бырайыактарынан үлэлэрин сүрүннүүргэ араас салаалартан үлэһиттэри сыһыаран, анал программаларга киирсэргэ үлэлэһэ олоробут. Күн бүгүн 9 саҥа бырайыагы култуурунай инициатива фондаларыгар түһэрэн олоробут. Маны тэҥэ өбүгэ үгэһин тарҕатыыга, утумнааһыҥҥа өр сыл оҕолору иистэнэргэ үөрэппит учуутал, сылгы туйаҕын таҥастаан тимэх, киэргэл оҥоруу ньыматын сөргүппүт Лөгөй нэһилиэгиттэн Светлана Олесова, улууспутугар тимири көрдүүр экспедицияны тэрийэн, булан, уһааран, үрдүк хаачыстыбалаах болгуону ылбыт тимир уустарын түһүлгэлэрин кыайыылаахтара Өлтөх нэһилиэгиттэн Олесов Петр Петрович, Найахы нэһилиэгиттэн Колесов Андриан Николаевич уонна Хоро нэһилиэгиттэн Петров Иван Семенович СӨ уус-уран оҥоһуктарын маастарын аатын ыллылар. Онон быйылгы сыл ситиһиилэртэн саҕаланан таһаарыылаах, түмүктээх үлэҕэ хайысхаланар.
Екатерина Захарова