Кыайыылаах хамаанда кыраҕы харахтаах, түргэн-тарҕан толкуйдаах уонна туттунуулаах чилиэннэрэ Ариан Аммосов (Уус Күөл бөһүөлэгэ, Курбуһах нэһилиэгэ), Альберт Стрекаловскай (Арыы Тиит бөһүөлэгэ, Бороҕон нэһилиэгэ), Николай Черкашин (Бэрт Ууһун нэһилиэгэ) буолаллар. Иккис – Чурапчы улууһа, үһүс – Сунтаар улууһа.
Улууспут хамаандатын салайааччыта Геннадий Оллонов уолаттар кыттыыларын маннык кэпсиир:
– Урукку өттүгэр бастыы иликпит. Биирдэ 3-с миэстэ буола сылдьыбыппыт, үксүн 5-10 миэстэлэр икки ардыларыгар сылдьар этибит. Быйыл уолаттар бэлэмнэрэ олус үчүгэй, элбэх күрэхтэһиилэргэ кыттыбыт, кыайбыт уопуттара хомуллан, өтөрүнэн хотторбот күүстээх хамаандаҕа кубулуйдубут.
Бу аҕыйах хонуктааҕыта Ариан Аммосов хамаанданан Россияҕа эмиэ чемпионнаан кэлбитэ. Уолаттарга инникитин да улууспут чиэһин эрэллээхтик көмүскүүллэрин баҕарабын. Эһиил Манчаары оонньууларыгар бу көрүҥ эмиэ баар.
Күрэхтэһиигэ биирдиилээн бастыыр иһин ытыыларга “А” категорияҕа спорт маастардара кииристилэр. Ситиһиилэрэ: 1 м. – Игорь Егоров (Ньурба), 2 м. – Ариан Аммосов (Уус Алдан), 3 м. – Айаал Макаров (Дьокуускай к.).
“В” категория (спорт маастарыгар кандидаттар): 1 м. – Георгий Новгородов (Дьокуускай к.), 2 м. – Николай Черкашин (УА), 3 м. – Альберт Стрекаловскай (УА).
“С” категория (сөбүлээн дьарыктанааччылар): 1 м. – Семен Сенин (УА), 2 м. – Алексей Слепцов (Орто Халыма), 3 м. – Владислав Пестерев (Амма).
Ольга Шепелева