Бу дьыл олунньу 16 күнүттэн полиция Уус Алданнааҕы отделыгар ГАИ отделениетыгар начальнигынан Мичил Гоголев ананан үлэтин саҕалаата. Мичил Дмитриевич Суоттуттан төрүттээх бэйэбит ыччаппыт. Кини Хабаровскайга баар Россия Ис дьыалаҕа министерствотын Дальневосточнай юридическай институтун бүтэрбит, юрист идэлээх.
– Мичил Дмитриевич, хаһыат ааҕааччыларыгар бэйэҥ тускунан билиһиннэриэҥ дуо? Бу дуоһунаска ананыаҥ иннинэ ханна үлэлээбит уопуттааххыный?
– Инники өттүгэр Уус Алданнааҕы отделга ГАИ отделениетыгар үлэлии сылдьан ГАИ батальонугар переводтанан барбытым, онтон ГАИ управлениетыгар, ГАИ ирдиир бөлөҕүн батальонугар, Ис дьыала министиэристибэтин экзаменационнай, техническэй надзорун уонна автомототранспортнай средстволарын регистрациялыыр отделыгар ГАИ старшай государственнай инспекторынан үлэлээбитим.
– Саҥа үлэҕэр туох былааннааххыный?
– Суолга-иискэ бэрээдэк сөптөөхтүк олохтоноругар болҕомтобун ууруом. Итиэннэ нэһилиэнньэҕэ өйдөтөр үлэни ыытыы, улуустааҕы үөрэх салалтатын кытары ситимнээх үлэ былааннанар. Оҕо кыра эрдэҕиттэн суол быраабылатын билиэхтээх. Мантан сайын мототехниканан хатааһылааһын элбиэҕэ, мотоциклы да, мопеды даҕаны бырааба суох ыытар көҥүллэммэт. Онон сокуону кэспэт инниттэн иһитиннэрэр үлэни күүскэ тарҕатыахпыт, онуоха СМИ, социальнай ситимнэр нөҥүө сырдатар үлэни ыытыахпыт. “Эдэр инспектор” хамсааһын чэрчитинэн куруһуоктары ыытар былаан баар.
– Эн көрдөххүнэ, эһиги үлэҕит хайысхатынан буруйу кэһии ордук туохха тахсарый уонна ону туоратар туһугар туох үлэ ыытыллыай?
– Сокуон хараҕа сыллата уларыйа турар. Ону дьон билбэккэ хаалыан сөп. Онон суолга сэрэхтээх буолуу саҥа быраабылатын, сокуоннарга уларыйыылары эрдэттэн билиһиннэриэхпит.
Уус Алданнааҕы ГАИ начальнига Мичил Гоголев: “Дьон суолга-иискэ сэрэхтээх буоларын ситиһэ сатыам, суол саахала тахсыбатын туһугар үлэлэһиэм”, – диэн кэпсэтиибит түмүгэр эппитинэн суруйуубун түмүктүүбүн.
Наталья Попова