Бу күннэргэ Бороҕоҥҥо П.А. Ойуунускай аатынан Саха академическай тыйаатыра гастроллуу сылдьар. Онно түбэһиннэрэн, төһө да каникул кэмэ буоллар, эдэр артыыстар оҕолору кытта көрүстүлэр.
Оҕо библиотекатын ааҕар саалатыгар оҕолордооҕор элбэх эдэр артыыс көрсүһүүгэ кэлбит. Мин тыйаатыр артыыстарын бачча чугастан көрө илигим. Кинилэри биһиги киинэлэринэн билэбит, тыйаатырга сылдьа иликпин. Эдэр артыыстар хайдах үөрэххэ туттарсыбыттарыттан саҕалаан эдэр-эдэр курдук кэпсээн-ипсээн бардылар.
Сытыы-хотуу сөбүлээн көрөр артыыскам Жанна Ксенофонтова кэпсэтиини саҕалаата, кини тыйаатыр туһунан, онно артыыстартан ураты элбэх араас идэлээх дьон үлэлиирин толору билиһиннэрдэ. Киинэҕэ наһаа үчүгэйдик оонньуур Айсен Лугинов артыыс буоларга ханнык хаачыстыба ордук наадалааҕын, тыйаатыр артыыһа киинэ артыыһыттан туох уратылааҕын сиһилии кэпсээтэ, онтон элбэх киинэни устар уонна бэйэтэ олус чаҕылхайдык оонньуур артыыспыт Павел Ченянов артыыс буоларга ханна үөрэниэххэ сөбүн, ордук творческай эксээмэни хайдах туттарыахха сөбүн быһаарда, биир дойдулаахпыт Илья Портнягин тыйаатыр реквизиттарын көрдөрдө. Эдэр артыыстары көрө олорон тыйаатыр диэн төрүт туспа айылгылаах сир эбит дии санаатым уонна баран көрүөхпүн баҕардым.
Руслан Тараховскай туруорбут “Төлкөтүн” дьон бары астына кэпсиир, ордук Зоя Багынанова, Иннокентий Луковцев, биир дойдулаахпыт Уус Алдантан төрүттээх Петр Садовников уонна суруксут оруолун толорбут Сергей Балановы сөбүлээн кэпсээтилэр.
Каникул кэмэ буолан, оҕо аҕыйах, биллэрии да үчүгэйдик барбатах, дьиҥинэн, улахан кылаастар үөрэнээччилэрэ кэлэн көрсүбүттэрэ буоллар, элбэҕи билиэ эбиттэр.
Уйгулаана Борисова, юнкор, Мүрү 1 №-дээх орто оскуолатын 10 «б» кылааһын үөрэнээччитэ