Бүгүн Дьокуускайга «Биир ньыгыл Россия» политическай партия регионнааҕы салаатын «Түмүк баар!» отчуоттуур-программнай форума бары улуустартан делегациялары көрүстэ.
Күн устата форум кыттыылаахтара кэлиҥҥи сылларга ситиһиллибити ырытыстылар, кэлэр кэмҥэ үлэ хайысхаларын торумнаатылар. Маныаха сүрүн болҕомто нэһилиэнньэ олоҕун-дьаһаҕын хаачыстыбатын тупсарыыга, социальнай инфраструктураны саҥардыыга, үөрэхтээһини уонна доруобуйа харыстабылын өйүүргэ, нэһилиэнньэлээх пууннарга табыгастаах эйгэни тэрийиигэ туһуланна.
Маннык форумнар бу күннэргэ дойду үрдүнэн ыытылла тураллар, биһиэхэ, Уус Алдаҥҥа, ааспыт нэдиэлэҕэ алта былаһаакканан үлэ тэриллибитэ, онно киирбит этиилэри түмэн, сүрүннээн, бүгүн улууспут олохтоох салаатын бэрэстэбиитэллэрэ форум былаһааккаларыгар кэпсэтиилэргэ көхтөөхтүк кытыннылар.
«Биир ньыгыл Россия» политическай партия Уус Алданнааҕы салаатын толорооччу сэкирэтээрэ Күннэй Рощина:
– Биһиги улууспутуттан «Биир ньыгыл Россия» партия регионнааҕы салаатын «Түмүк баар!» форумугар 21 киһилээх делегация кытта сылдьар. Алта былаһааккаҕа барытытыгар кытынныбыт: холобур, Уус Алданнааҕы кииннэммит балыыһа кылаабынай бырааһа Сергей Черкашин «Здоровое будущее – преемственность поколений и семейные ценности» былаһааккаҕа улууспутугар доруобуйа харыстабылын үлэтин, сайдыытын туһунан кэпсээтэ. Иннокентий Аммосов «Культурный код – созидательная энергия родного края» тиэмэлээх «төгүрүк остуол» тэрээһинигэр дакылаатын иһитиннэрдэ. Салгыы партия өйөбүлүнэн тутуллубут, үлэҕэ киирбит эбийиэктэри кэрийэн көрдүбүт.
Билигин форум үлэтин түмүктүүр пленарнай чаас саҕаланна. Онно «Бастыҥнар хамсааһыннара» тэриллии улуустааҕы филиалын исписэлииһэ Айыына Бережнева СӨ Ил Дархана Айсен Николаевтан партия чилиэнэ буолбутун туоһулуур билиэти тутуохтаах.
«Биир ньыгыл Россия» партия Уус Алданнааҕы салаатын политсэбиэтин чилиэнэ Евгения Аргунова:
– «Биир ньыгыл Россия» партия бырайыактара уонна «Норуот бырагыраамата» — дойдубут республикабыт улууспут социальнай-экономическай сайдыытыгар туһуламмыт үлэ. Бүгүн бу тула киэҥ хабааннаах кэпсэтиилэргэ кытынныбыт, ырытыһыыларга санаабытын үллэһиннибит.
Бу бырайыактар социальнай эйгэ араас хайысхатыгар үлэлииллэр. Ол курдук доруобуйа харыстабыла, үөрэх, тутуу эйгэтэ, дьон олорор эйгэтин тупсарыы уонна анал байыаннай дьайыы тула. Билиҥҥи кэмҥэ байыаннай дьайыы кыттыылаахтарыгар уонна кинилэр дьиэ кэргэттэригэр көмөнү оҥоруу олус улахан суолталаах.
«Биир ньыгыл Россия» бырайыактара дьон олоҕун тупсарар аналлаахтар. Биһиги улууспутугар ити ааттаабыт бырайыактарбытынан элбэх үлэ оҥоһуллубута, оҥоһуллар даҕаны. Онон «Биир ньыгыл Россия» баартыйа бырайыактарын үлэтин түмүгэ баар.