Танда бөһүөлэгэр олунньуга хантан да көһүппэтэх иэдээн тахсан, уһуйаан дьиэтэ уокка былдьанан, ытыспытын соттон хаалбыппыт. 1981 сыллаахха үлэҕэ киирбит уһуйаан икки куорпуһуттан биирэ олоччу уокка былдьаммыта. Тандатааҕы уонна улуус баһаарынай чааһын биригээдэлэрэ, нэһилиэк дьоно-сэргэтэ бары турунан түүннэри үлэлээн, баһаары умуруорбуттара.
Быһылаан күн тута суһал мунньах тэриллэн, СӨ Бырабыыталыстыбатын бэрэссэдээтэлин бастакы солбуйааччы Д.Д. Садовников дьаһалынан тутуу биригээдэтэ тахсан дьиэни-уоту көрөн, үөрэтэн типовой тутуу маҥнайгы куорпуһун сөргүтүү үлэтэ саҕаламмыта. Бу күчүмэҕэй, ыксаллаах кэммитигэр күүс-көмө буолбут улууспут баһылыга Василий Алексеевка, баһылык I солбуйааччыта Семен Бурнашевка, тутуу салаатын начальнигар Максим Гуляевка, исписэлиистэр Лена Аммосоваҕа, Иосиф Егоровка, улууспут үөрэҕин эйгэтин салайааччытыгар Федор Татариновка, оскуола иннинээҕи үөрэхтээһин салаатын салайааччытыгар Евдокия Ушницкаяҕа, материальнай-техническэй салаа үлэһиттэригэр Николай Тарабукиҥҥа, Егор Филипповка, нэһилиэкпит баһылыгар Савва Егоровка, баһылык солбуйааччыта Анатолий Готовцевка махталбыт улахан. Ону тэҥэ өрөмүөннүүр биригээдэ салайааччыта Савва Алексеевка, нэһилиэкпит дьонугар-сэргэтигэр, тэрилтэлэр бары үлэһиттэригэр, төрөппүттэрбитигэр, өрөмүөн кэмигэр улахан техникаларынан көмө оҥорбут Никита Готовцевка, Василий Аммосовка, ким да туора турбакка сөргүтүү үлэтигэр кыттыһан, уһуйааммыт түргэнник үлэҕэ киирэригэр көмөлөспүт дьоммутугар махталбытын тиэрдэбит.
Олунньу 12 күнүгэр эстрада артыыстара Бороҕон сэлиэнньэтигэр улахан аахсыйа кэнсиэри тэрийэн ыыттылар. Манна сүүрбүт-көппүт, артыыстары кытта кэпсэтэн кэнсиэри тэрийсибит Тандатааҕы сынньалаҥ киин дириэктэрэ Альберт Находкиҥҥа, улууспут депутаттарын сэбиэтин бэрэссэдээтэлигэр Иннокентий Аммосовка, улуус бэтэрээннэрин сэбиэтин бэрэссэдээтэлигэр Иван Колодезниковка, култуура управлениетын салайааччыта Эльза Киренскаяҕа, «Тойон Мүрү» култуура дыбарыаһын директорыгар Максим Гоголевка уонна аахсыйаҕа кыттыбыт бары дьоммутугар-сэргэбитигэр махтанабыт! Кинилэри сэргэ улууспут бары тэрилтэлэрэ, уһуйааннара, оскуолалара, коллегаларбыт, уопсастыбаннай хамсааһыннар үтүмэн көмөнү оҥордулар.
Ол түмүгэр бары күүһү холбоон аҕыс күн иһинэн «Кэнчээри» оҕо уһуйаана үлэҕэ бэлэм буолан, олунньу 16 күнүгэр кырачааннары көрсүбүтэ. Уһуйааммыт оҕолоро дьэрэкээн араас оонньуурдарынан, сайыннарар, дьарыктанар тэриллэринэн хааччылыннылар. Саҥаттан- саҥа кинигэлэр, остуол оонньуулара, мээчиктэр, араас атрибуттар кэлэн иитиллээччилэрбит үөрүүлэрэ үгүс.
Күн бүгүнүгэр диэри өрөспүүбүлүкэбит араас улуустарыттан, Дьокуускайтан, Москваттан тиийэ көмө кэлэ турар. Ол курдук, «Кэнчээри» уһуйаан выпускниктара Валерия Матвеева, Ефросиния Волынкина үтүмэн элбэх маскарааты, оҕону сайыннарар оонньуур арааһын хомуйан ыыттылар. Төрөөбүт нэһилиэктэригэр өрүү күүс-көмө буолар чулуу уолаттарбыт «СТК-2020» ХЭТ тутуу хампаанньатын салайааччыта Анатолий Заболоцкай, чааһынай предприниматель Афанасий Заболоцкай, «Оһуор утум» ювелирнай фирма генеральнай директора Александр Заболоцкай, биологическай наука кандидата, Байаҕантай нэһилиэгин бочуоттаах олохтооҕо Константин Кривошапкин, «Айар уус» креативнай колледж коллектива, «ТехноЛогика» эргиэн хампаанньатыттан Алексей Иванов, Лөгөй нэһилиэгин 5-с кылааһын үөрэнээччилэрэ, Найахы нэһилиэгин «Чэчир» уһуйаанын бэтэрээн үлэһиттэрэ, о.д.а. көмөлөрө улахан.
«Кэнчээрибит» билиҥҥи туругунан сүрүн малынан хааччыллан, кырачааннар сылдьар, сайдар эйгэлэрин ситэрэр үлэ бара турар. Оҕолор уһуйааҥҥа үөрэ-көтө кэлэллэр.
Норуот күүһэ – көмүөл күүһэ диэн мээнэҕэ этиллибэт! «Кэнчээри» уһуйаан иитиллээччилэрин уонна коллективын аатыттан бар дьоммутугар ыраас халлааны, чиҥ доруобуйаны, өрүүтүн бу курдук үтүө санаалаах, түмсүүлээх буолуоҕуҥ диэн баҕарабыт!
Светлана Аммосова, Танда бөһүөлэгин «Кэнчээри» уһуйаанын бас иитээччитэ