Анал байыаннай дьайыыга сылдьар биир дойдулаах хорсун байыастарбытын хаҕыс тымныыттан уонна дронтан харыстыыр туһуттан Мүрү нэһилиэгэр баар «Швейный патриот» волонтердарын иис сыаҕа байыаннай дьайыы саҕаламмыт сылыттан сыраларын, кыһамньыларын ууран кэллилэр.
Бүгүн кэнники үлэлэрин билсэ «Швейный патриот» сыах тэриллибит волонтердар үлэлиир балаҕаннарыгар тиийэ сырыттым. Волонтер иистэнньэҥнэр Россия Дьоруойа Александар Находкины көрсөөрү тэринэ сылдьаллара. Сыаҕы салайар Валентина Шадрина бу курдук кэпсии тоһуйда:
– Грант харчытын кэнниттэн, улууспут дьаһалтатын фондатын көмөтүнэн дронтан хаххалыыр суорҕаны уонна плащ-пончоны 450 устууканы тигэн, быйыл бэс ыйын ортотугар түмүктээн байыаннай дьайыыга кытта сылдьар биир дойдулаахтарбытыгар анаан ыыппыппыт.
Салгыы «Якутия с тобой» республикатааҕы хамсааһынтан матырыйаал ылан эмиэ иистэммиппит. Арыт «Якутия с тобой» уопсастыбаннай хамсааһын филиалын курдук үлэлээн ылааччыбыт. Ол тигиилэрбитин кинилэргэ ыытабыт. Холобур, 30 устуука футболка, аҕыйах устуука плащ-пончолары тикпиппит.
Онтон быйыл күһүҥҥүттэн эмиэ тугу эрэ саҕалыы турбут киһи диэн толкуйдаан баран, плащ-пончолары тикпит матырыйаалбыт тобоҕунан анал олбохтору тиктибит. Бу олбохтор эрэһиинэ быалаах буоланнар, байыастар кэтэ сылдьаллар, оччоҕо ыллылар да тымныы, сииктээх сиргэ олороллоругар табыгастаах буолар. Маннык олбоҕу 100 устууканы тигэн бэлэмнээтибит. Эмиэ матырыйаалбыт тобоҕуттан аттаран ичигэс сэлиэччиктэри тиктибит. Бу сэлиэччиги уолаттар сөрүүн блиндажка, таһырдьа даҕаны тымныыга кэтэргэ бэрт эбит диэн олус биһирээбиттэрэ.
Онтон бу ыйга улуус дьаһалтата 200 тыһыынча солк. харчы көрдө. Инньэ гынан, дронтан хаххалыыр суорҕаны тигэн испиппит эрээри, эрдэ грант харчыта элбэх буолан, кэтит суорҕаны тигэ сырыттахпыт дии, ол иһин синньигэс суорҕаннары тигэрдээҕэр плащ-пончо тикпиппит ордук эбит диэн биир сүбэҕэ кэлэн, пончолары тигэн эрэбит.
Күн бэҕэһээ байыаннай дьайыы кыттыылаахтарын боппуруостарыгар үлэлэһэр улуус дьаһалтатын исписэлииһэ Егор Черкашины, «Эрэл» фонда салайааччыта Иван Захаровы ыҥыран сүбэлэһэн, пончо тигэр ордук эбит диэн быһаарбыппыт. Онон 11 суорҕаны тикпиппит таһынан 60 устуука плащ-пончо тигэн саҕалаары сылдьабыт.
Итиэннэ куруук бу малларбытын кичэллээхтик халаан ыытарга анал мөһөөччүк тигэбит. Быйылгыттан биһиэхэ Сардаана Николаевна кэргэнэ Роман Михайлович үлэлэһэр, суоппар волонтербут диэн ааттыыбыт. Куораттан матырыйаалбытын аҕалан биэрэр. Кини үлэтин быыһыгар таксилыыр, ол таксилаабыт харчытынан матырыйаал ылан аҕалтаабыта. Бу матырыйаалынан биһиги пончоларбытын бүтэрдэхпитинэ, халыҥ сэлиэччиктэри тигиэхпит.
Бүгүн Мүрү нэһилиэгин дьаһалтатыгар финансиһынан үлэлиир Татьяна Говорова 3 тыһыынчаны спонсордаата. Ити курдук, наһаа үтүө санаалаах дьон бааллар. Итиэннэ 50 миэтэрэ синтепон матырыйаалы ыларбытыгар Мүрү дьаһалтата 13 тыһыынча солк. харчы көрбүтэ. Өссө күн бэҕэһээ улуус фондатыттан эбии 10 000 солк. көрдөһөн ыллыбыт, онон эбии синтепон ылыахтаахпыт.
Бу үтүө санаанан салайтаран үлэлиир «Швейный патриот» сыах волонтердара харыс да уларыйакка, биир төлөбүрэ суох алтыа буолан үлэлээн кэллилэр. Ол курдук Матрена Мырсанова, Сардаана Босикова, Елизавета Попова, Ирина Аргунова, Светлана Ушницкая, Валентина Шадрина. Светлана Николаевна Дьокуускайга кыстыыр, «Якутия с тобой» ыстаабыгар иистэнэр. Быйыл «Дьол уйата» түмсүүттэн Варвара Кривошапкина киирэн иистэнэ сылдьар. Онон алтыа буоланнар, бу үлэлэрин сэтинньигэ диэри түмүктээн, биир дойдулаах байыастарбытыгар тиксэриэхтээхтэр.
«Билигин үлэ саамай тыҥааһыннаах кэмэ, субуота күн эмиэ иистэнэр булуохпут», – дэһэллэр амарах санаалаах иистэнньэҥнэр. Бу дронтан хаххалыыр суорҕан буоллун, плащ-пончо буоллун – барыта хас эмэ араас матырыйаалы хос-хос тутан тигиллэр. Онон быһыытыттан саҕалаан тигиитэ олус элбэх сыраны, бириэмэни эрэйэрэ чахчы. Ол эрээри, уот-кутаа ортотугар сылдьар байыастарбыт кинилэр иистэрин тутан үөрүүлэрин, махталларын биллэрэллэриттэн кынаттанан күннэтэ үлэҕэ тиэтэйэллэр. Кинилэр сылаас илиилэринэн тикпит таҥастара дьоммут этэҥҥэ сылдьалларыгар көмөлөстөҕүнэ, хаҕыс тымныы хаарыйбатаҕына, сырдык тыыннарын өрөһүйдэҕинэ – ол буоллаҕа кинилэр хара көлөһүннэрин күндү, сыаналаммат төлөбүрэ.
Матырыйаал суруллар кэмигэр Арассыыйа Дьоруойа Александр Находкин номнуо балаҕаҥҥа тиийэн иистэнньэҥнэри уонна байыаннай дьайыылар кыттыылаахтарын кытта көрүстэ, сүбэ-соргу тылларын эттэ, күн бүгүн дойдуларыттан ыраах сылдьар байыастарга күннэтэ кыһамньыларын ууран илиилэрин сылааһын бэлэхтиир далбар хотуттарга махталын эттэ.
Мария Аргунова