Дүпсүҥҥэ муус устар 23 күнүгэр нэһилиэкпит кэрэ аҥаардарын түмпүт бэрт сэргэх тэрээһин буолан ааста – улууспут дьахталларын үс түмсүүтүн салайааччылара, активистара кэлэн инники былааннарын үллэһиннилэр, идея, санаа атастаһыытыгар дьыалабыай оонньууну, маастар кылаастары ыыттылар.
Дьиэ кэргэн, алаһа дьиэ хотуна тугу сатаабатаҕа баарай? Ыалдьыттарбыт дьахтар кэрэни, үйэлээҕи, үтүөнү тэрийэ, айа, дьону үөрдэ, угуйа сылдьарын өссө төгүл бигэргэтэн сөхтөрөн бардылар. Биһиги петуния сибэккини олордуу кистэлэҥнэрин, кыбытык тигии ымпыгын, видеоны устууга, монтажтыырга, доруоһата суох килиэби астыырга сүбэлэри ылан, бэлэм закваска бэлэхтээх, оҕуруонан киэргэл оҥостон элбэҕи билэн, туһалаах дьарыктарга сылдьан, санаа атастаһан астынан, махтанан тарҕастыбыт.
Анастасия Сивцева, педагогическай үлэ бэтэрээнэ, «Иэйии» ырыа ансаамбылын салайааччыта:
– Мин улууспут киинин дьахталларын хамсааһыннарын үлэлэрин сэргээтим. Бары эдэрчилэр, эрчимнээхтэр, үлэлиэн-хамсыан баҕалаахтара көстөр. Тустаах үлэлэрин таһынан общественнай үлэнэн дьарыктаналлара кэрэхсэбиллээх. Биһиэхэ элбэх туһалаах маастар кылааһы көрдөрдүлэр. Барытын бэйэ тылынан чэпчэкитик, киһи өйдүүр гына, хос-хос ыйыттахха, сылайбакка эппиэттээтилэр, сүбэлээтилэр. Тэрээһинтэн астынным.
Дүпсүҥҥэ эдэрдэрбит эмиэ итинник ылсаллара, кыттыһаллара буоллар, нэһилиэк олоҕо сэргэхсийиэ, сайдыа этэ.
Онон Дүпсүн дьахталларын кэмитиэтин үлэтигэр саҥа сүүрээннэри, бырайыактары толкуйдуулларыгар уонна ситимнээх үлэни баҕарабын.
Ньургуйаана Ушницкая, «Сардаҥа» уһуйаан иитээччитэ, элбэх оҕолоох эдэр ийэ:
– Бүгүҥҥү тэрээһин олус тэрээһиннээхтик барда. Үс түмсүү кэмитиэтэ олус сэргэх маастар кылаастары ыыттылар. Боростуойдук, өйдөнүмтүөтүк быһааран биэрдилэр. Кэлбит Дүпсүн олохтоохторо олус сэҥээрэн, бэйэлэрин бастыҥ баҕа санааларын этэн тарҕастылар. Инникитин бу курдук ситиммитин быспакка, кэмиттэн кэмигэр көрсөн, буолуохтаах үлэни торумнаан үлэлиэххэ диэн баҕа санаалаахпын.
Пелагея Соловьёва, СӨ уус-уран оҥоһуктарын маастара, «Уран тарбахтар» түмсүү салайааччыта:
– Улууспут дьахталларын Сэбиэттэрин саҥа састаабыттан үс түмсүү буолан, Дүпсүҥҥэ кэлэн олус сэргэх тэрээһини ыыттылар. Тыа сирин нэһилиэнньэтин олоҕун-дьаһаҕын, үлэтин-хамнаһын хайдах тэринэн олороллорун билсэ, бииргэ үлэлииргэ олук уура, санаа атастаһа, бэйэлэрин сатабылларын билиһиннэрэ-көрдөрө, инникини түстэһэ, үлэлэригэр тирэх буолар гына бырайыактары оҥорсон күммүт олох биллибэккэ ааста. Дүпсүн олохтоохторо ийэлэр, эбэлэр араас маастар кылаастарга дьарыктанан илии тутуурдаах буоллулар. Ыалдьыттарбытын эдэр эрчимнээх, үлэлиэн баҕалаах кыргыттар эбит диэн астына хааллыбыт. Салгыы улууспут бары нэһилиэктэрин дьахталлара биир сомоҕо буолан үлэлээтэхпитинэ улууспут сайдыытыгар төһүү күүс буолуо этибит. Биһиги, аҕа көлүөнэ дьон, олохпут оҥкула тупсарын туһугар эдэрдэр күүскэ туруммуттарын өйүөххэ, суолларын арыйан биэриэххэ, сүбэ-ама буолуохха диэн баҕа санаабын этэбин.
Улуус дьахталларын сүбэтигэр, салайааччы Евгения Местниковаҕа, «Россия Ийэлэрэ» Уус Алданнааҕы филиалыгар салайааччы Ольга Алексееваҕа, «Биир ньыгыл Россия» партия дьахталларын хамсааһыныгар, салайааччы Евгения Аргуноваҕа Дүпсүн нэһилиэгин дьахталларын ааттарыттан махтал тылларын этэбит. Үлэлэригэр ситиһиини, үгүс киһини хабар далааһыннаах үлэни баҕарабыт.
Людмила Ноговицина, Дүпсүннээҕи дьахтар сүбэтин салайааччыта