Дьокуускай куоракка Саха Өрөспүүбүлүкэтин муниципальнай тэриллиилэрин X сийиэһин чэрчитинэн улуус баһылыгын бастакы солбуйааччы Семен Бурнашев салайааччылаах Уус Алдан улууһун делегацията СӨ тыатын хаһаайыстыбатын миниистирин солбуйааччы, Уус Алдан улууһун куратора Анна Стручкованы кытары көрүстэ.
Көрсүһүүгэ улууска күн бүгүн ыытылла турар үлэни-хамнаһы билиһиннэрдилэр, өрөспүүбүлүкэ таһымыгар быһаарыллыахтаах, тыа сирин сайдыытыгар тустаах боппуруостары сиһилии ырыттылар, инвестиционнай бырайыактар уонна судаарыстыбаннай өйөбүл хайысхаларын кэпсэттилэр.
Сийиэс правительственнай чааһыгар Уус Алдан улууһун баһылыктарын аатыттан Бэрт Ууһун нэһилиэгин баһылыга Илья Ильин тыа сирин олоҕун тупсарыыга, үлэ-хамнас хаачыстыбатын үрдэтиигэ итиэннэ эдэр дьону төрөөбүт дойдуларыгар тахсан үлэлииллэрин ситиһэр үлэни ыытыыга этиилэри киллэрдэ.
Ол курдук тыа хаһаайыстыбатын салаатынан эт-үүт аһы оҥорон таһаарыыны дэлэтиигэ эрэгийиэн экономиката бөҕөргүүрүгэр тирэх буолар муниципальнай бырагыраамалары оҥорууну, манна агропромышленнай инфраструктура эбийиэктэрин тутуу уонна саҥардыы сүрүн соругунан туруоруллар, маны тэҥэ 2027-2029 сыллары тыа хаһаайыстыбатын сылынан биллэрэн үс сыллаах былааны ылынан үлэлиири, агропромышленнай комплекс үлэтин киэҥник сырдатыыны, үлэ суолтатын үрдэтиини уонна эдэр исписэлиистэри тардыы боппуруоһун, «Тирэх пуун» испииһэгэр киирбэт ыраах сытар нэһилиэктэри сайыннарыыга анаан эрэгийиэннээҕи комплекснай бырагырааманы оҥорон саҕалыыры итиэннэ 2026 сылга тыа хаһаайыстыбатын сайыннарыы госбырагырааматын үп-харчы өттүнэн хааччыйыыга парламент хонтуруолун күүһүрдүүнү, ону таһынан муниципалитеттар икки ардыларыгар уопут атастаһар холбоһуктаах сэминээрдэри, куурустары уо.д.а. тэрийэн ыытар көҕүлээһиннэри өйүүллэригэр ыҥырда.
Маны сэргэ Илья Прокопьевич бэйэтин нэһилиэгин кыһалҕатыгар тохтоото. Бэрт Ууһун нэһилиэгэр чугаһынан оттук мас суоҕунан олохтоохтор оттукка эрэйи көрсөллөрүн иһитиннэрдэ. Тыа сиригэр дьон олохсуйар усулуобуйатын тэрийиигэ чааһынай дьиэлэри ититии ситимигэр киллэрии биир сүрүн боппуруоһунан турар. Онон тыа сирин кыһалҕатын учуоттаан, бу боппуруоска өйөбүл-көмө наадатын эттэ.
Улуус дьаһалтатын пресс-сулууспата