Мүрү 1 нүөмэрдээх орто оскуолатын 11 «а» кылааһыгар үгүс биридимиэккэ «5» сыанаҕа үөрэнэр Нарыйаана Колмакова ХИФУ пединститута тэрийэн ыытар педнаука дуоктара, профессор, олимпиаданы бастаан тэрийбит А.В. Мордовская аатынан педагогика уонна психология өрөспүүбүлүкэтээҕи XIX олимпиадатыгар кыттыытын туһунан сэһэргиир.
– Быйылгы үөрэх сылыгар педагогика уонна психология олимпиадатыгар бастаан оскуолаҕа, онтон улууска бастаабытым. Санаам күүһүрэн, өрөспүүбүлүкэтээҕи олимпиадаҕа кыттарга санаммытым. Бастаан өрөспүүбүлүкэ үрдүнэн кэтэхтэн 80-ча 10 уонна 11 кылаастар үөрэнээччилэрэ өрөспүүбүлүкэтээҕи олимпиада бастакы этабыгар кыттыбыттара. Үс түһүмэҕинэн судургута суох сорудахтары толорон ыыппытым. Кылааһым салайааччыта Л.В. Бурцева салалтатынан үлэлээбитим, элбэҕи аахпытым.
Кулун тутар 6 күнүгэр өрөспүүбүлүкэ улуустарыттан 10 оҕо талыллан түмүктүүр этапка ыҥырыллыбыппыт. Кулун тутар 13 күнүгэр Дьокуускайга 31-с нүөмэрдээх оскуолаҕа олимпиада кыттыылаахтара сирэй көрсөн күрэхтэспиппит.
Бастаан тест толорбуппут. Салгыы иитэр үлэ тиэмэтигэр кылаастарга уруоктары ыыппыппыт. Мин 5-с саха кылааһыгар түбэспитим. «Единство народов России – основа традиционных ценностей воспитания» тиэмэҕэ уруогу ыыппытым. Куоракка барыам иннинэ бэлэмнэнэ таарыйа кылааһым оҕолоругар ыыппытым. Кылааһым оҕолоро олус өйөөтүлэр, уруок кэмигэр туттар матырыйаалларбын оҥорууга көмөлөстүлэр. Онон кылааһым оҕолоругар, кылааһым салайааччытыгар Люция Васильевнаҕа махтанабын.
Люция Васильевна хас биирдии оҕону үлэлэтэ сатаар диэбитин сорук туруорунан, бастаан олох интэриэһэ суох олорбут оҕону кытта үлэлэппитим. Ону дьүүллүүр сүбэ таба көрөн, кэлин ырытыыга бэлиэтээбитэ.
Олимпиада бүтэһик үһүс түһүмэҕэр бэйэни билиһиннэрии буолбута. Бастаан бэйэм туспунан кэпсээбитим, онтон салгыы видеонан визиткабын көмүскээбитим.
Кыттыбыт 10 оҕо түмүгү долгуйа кэтэспиппит. Олимпиада түмүгүнэн 5 номинацияны олохтообуттарын эппиттэрэ. Мин «Педагогическай лиидэр» анал ааты ылбытым олус долгутуулааҕа. Оскуолабын бүтэрээри сылдьан улахан ситиһиибиттэн үөрэбин.
Бу олимпиадаҕа миигин бэлэмнээбит, тэҥҥэ сылдьыспыт, өйөөбүт кылааһым салайааччытыгар Люция Васильевнаҕа улаханнык махтанабын. Инники идэбин психология хайысхатыгар көрөбүн. Тэрээһиннэри ыытыһарбын, оонньуулары тэрийэрбин сөбүлүүбүн. Бу талбыт идэбинэн, инники үөрэхпинэн БКЭ биридимиэттэрин талбытым. Иллэҥ кэммэр араас оҥоһуктары оҥорорбун, кинигэ ааҕарбын ордоробун. Оскуолам биэрбит үөрэҕэ, билиитэ, бу олимпиадаҕа кыттыым инникитин туһалыаҕа диэн эрэллээхпин.
Елена Сыроватская, уопсас. кэрэсп.