Бастакы, иккис Ыспааһап таҥара күннэрэ ардахтаах буолан биэрдилэр. Ити эрээри отчуттар ол быыһынааҕы кураан күннэри таба туһанан ходуһа быйаҥын сомсоллор.
Улуустааҕы тыа хаһаайыстыбатын управлениетыттан иһитиннэрбиттэринэн, атырдьах ыйын 21 күнүнээҕи туругунан, ходуһаҕа билигин даҕаны 663 киһи оттуу сылдьаллар. Барыта 316 звено үлэлиир. Мантан 187 механизированнай, 120 механизированнай аҥаардаах, 1 көлө, 8 илии звенолара бааллар. Онно 425 тиэхиньикэ үлэлиир.
Бу кэмҥэ 28512 га ходуһа охсулунна, 30445 т от кэбиһилиннэ. Ити тиэрдиллибит былаан (33478) 91% тэҥнэһэр.
Былырыын, 2022 сыл атырдьах ыйын 22 күнүгэр 19667 т от бэлэмнэммит. Былаан 30000 т этэ. Онон 65,5% буолбут.
Күн-дьыл туругун көрдөххө, бу нэдиэлэ кураан эбит. Оттон оттооһун билигин да өссө биир ый барыан сөп. Ол аата тиэрдиллибит былаан туоларыгар бириэмэ баар курдук. Билгэһиттэрбит таҥара күннэрин бэлиэтиэ (ардыа) дииллэр. Саамай чугас таҥара күнэ атырдьах ыйын 29 күнүгэр Үһүс Ыспааһап баар. Ардах эрэ мэһэйдээбэтэр от өссө да оттонуоҕа, үүнүү ханан да үчүгэй.
Афанасий Сектяев