Улуу Кыайыы 80 сылын көрсөр «Кыайыы знамята» республикатааҕы эстафета тохсунньу 9 күнүттэн Мэҥэ Хаҥалас улууһуттан саҕалаан Амма, Уус Маайа, Алдан, Нерюнгри улуустарынан кэрийэн бүгүн улууспут киинигэр – Мүрү нэһилиэгэр тиийэн кэллэ. Кыайыы знмятын уруйдуур үөрүүлээх тэрээһин «Тойон Мүрү» култуура киинигэр буолла.
Фашизмы урусхаллааһын ытык бэлиэтин – 150-с Идрицкэй стрелковай дивизия Кутузов аатынан II ст. уордьаннаах штурмовой былааҕын – 1945 сыллаахха ыам ыйын 1-гы күнүгэр Кыһыл Армия байыастара Алексей Берест, Михаил Егоров уонна Мелитон Кантария Берлиҥҥэ Рейхстаг дьиэтин үрдүгэр аспыттара.
Кыайыы знамята биһиги улууспутугар күн бэҕэһээ кэлэн, номнуо хас да нэһилиэги кэрийдэ, онон бүгүҥҥү тэрээһин Кыайыы знамята нэһилиэктэринэн айанын көрдөрөр видеосюжеттан саҕаланна.
Ол кэннэ Аҕа дойду Улуу сэриитигэр хорсун быһыы, төрөөбүт дойдуга муҥура суох таптал ытык бэлиэтинэн буолбут Кыһыл знамяны байыаннай дьайыы кыттыылаахтара – старшай сержант, «Хорсунун иһин» мэтээл хаһаайына Роман Ноговицын, «Вагнер» байыаһа, Бахмут куораты ылыы иһин, «Эр Хоһуун (Хара кириэс)» уордьанынан наҕараадаламмыт Станислав Кирилин, ефрейтор Михаил Слепцов күөрэччи тутан киллэрбиттэрин, мустубут дьон сүһүөххэ туран көрүстүлэр.
Үгүс ыар сүтүгүнэн кэлбит Улуу Кыайыыбыт кытыастар знамята кэлбитинэн эҕэрдэ тылы улуус баһылыга Василий Аммосов, Мүрү нэһилиэгин баһылыга Прокопий Румянцев, 1-кы Хоро нэһилиэгин баһылыга Василий Бурцев, Уус Алдан улууһун бэтэрээннэрин Сэбиэтин бэрэссэдээтэлэ Олег Федоров, Уус Алдан улууһун, Мүрү уонна Найахы нэһилиэктэрин бочуоттаах олохтооҕо, Саха сирин бочуоттаах бэтэрээнэ, үлэ, тыыл бэтэрээнэ Мария Фомина, байыаннай дьайыы кыттыылааҕа Роман Ноговицын, Мүрүтээҕи уолаттар гимназияларын 10-с кылааһын үөрэнээччитэ Айаал Васильев эттилэр.
Бу дьоро күҥҥэ Аҕа дойду Улуу сэриитин, Кыайыы күнүн туһунан үгүс ырыа ылланна, кыайыыны уһансыбыт дьоммут үтүө ааттарыгар үтүмэн тыл этилиннэ. Бу төрөөбүт дойдуга тапталы туоһулуур Улуу Кыайыыбыт историятын салгыы тутан хаалар үүнэр ыччаппыт – Мүрү бары оскуолатын үөрэнээччилэрэ – ыраас харахтарыгар сүгүрүйүү, махтал, киэн туттуу уота арылхайдык көһүннэ.
Кыайыы знамята салгыы түөрт дьоруойдаах Байаҕантай нэһилиэгэр айанныаҕа.
Мария АРГУНОВА