Россияҕа алтынньы 28 күнүгэр – Эбэ, эһэ күнэ бэлиэтэнэр. Бу бэлиэ күн дьиэ кэргэн сибээһин уонна оҕону иитиигэ аҕа көлүөнэ оруолун, суолтатын үрдэтэр сыаллаах олохтоммута. Бу күҥҥэ анаан сиэн оҕолорун үлэҕэ сыһыаран, оҕону иитиигэ төһүү күүс буолан Тулуна бөһүөлэгэр олорор Неустроевтар дьиэ кэргэн туһунан сырдатыым.
Ыал аҕа баһылыга Николай Саввич II Байаҕантайтан төрүттээх Герой ийэ Прасковья Петровна Неустроева ахсыс оҕото буолар. «Дүпсүн» сопхуоска сылгыһытынан, кэлин бааһынай хаһаайыстыба тэринэн үлэлиир. Ийэлэрэ Маргарита Васильевна – Тулуна олохтооҕо, 1996 сылтан Тулуна бибилэтиэкэтин сэбиэдиссэйинэн үлэлиир.
Неустроевтар түөрт оҕону төрөтөн, үөрэттэрэн үлэһит үтүөтэ оҥордулар. Улахан уол Артем – «Ростелеком» Уус Алданнааҕы филиалын сүрүннүүр инженерэ, кэргэнэ Варвара киин бибилэтиэкэ кылаабынай бибилэтиэкэринэн үлэлиир. Үс оҕолоохтор. Улахан уол Айхал – Мүрү 1-гы №-дээх орто оскуолатын 11-с кылааһын үөрэнээччитэ, өрөспүүбүлүкэҕэ, улууска үгүс НПК кыайыылааҕа, мас тардыһыытынан дьарыктанар. Ксюша 10-с кылаас, «Кэнчээри» оҕо образцовай ансаамбылыгар ыллыыр, волейболунан дьарыктанар. Арина 6-с кылаас, «Кэнчээри» ансаамбылга үҥкүүлүүр, волейбол, баскетбол көрүҥнэринэн дьарыктанар.
Орто уол Николай «Мүрү саһарҕата» улуус хаһыатыгар печатнигынан үлэлиир, кэргэнэ Саргылана – нэһилиэнньэ социальнай көмүскэлин кэлим киинин сүрүннүүр исписэлииһэ. Үс оҕолоохтор. Арсен – Мүрү 2-с №-дээх орто оскуолатын 9-с кылааһын үөрэнээччитэ, «Поколение бизнес» олимпиадаҕа «Утиная ферма» бырайыагынан III үрдэл хаһаайына, үгүс НПК кыттыылааҕа. Милана 5-с кылаас, Бороҕоннооҕу оҕо ускуустубатын оскуолатыгар уруһуй салаатыгар дьарыктанар уонна кыра кыыстара Инесса сэттэ ыйдаах.
Соҕотох кыыстара Айталина Уус Алданнааҕы нэһилиэнньэ социальнай көмүскэлин кэлим киинигэр төлөбүр отделын начаалынньыгынан үлэлиир.
Кыра уоллара Иван Дьокуускайга олорор, СӨ Росгвардия управлениетын, вневедомственнай охрана салаатын сэбилэниигэ инспектора, кэргэнэ Людмила Дьокуускайдааҕы 2-с №-дээх балыыһаҕа оҕо бырааһынан үлэлиир. Икки уоллаахтар. Ньургун – Саха гимназияҕа 1-кы кылааһын үөрэнээччитэ, Бэргэн – оҕо саадын иитиллээччитэ.
Николай, Маргарита Неустроевтар ыал буолуохтарыттан сүөһүнү, сылгыны иитэллэр, оҕуруотунан умсугуйан дьарыктаналлар. Салгыы сиэннэри иитиигэ оруолларын туһунан Маргарита Васильевна маннык кэпсиир:
– Оҕолорбут кыра эрдэхтэриттэн бэйэбитин кытта тэҥҥэ үлэлии үөрэнэн, үлэҕэ үөрүйэхтэр. Билигин тыа сирин үлэтигэр сиэннэрбитин сыһыаран, сайын аайы бары мустан ньирэйдэри, кустары, хаастары, индюктары, кууруссалары көрөллөр, аһаталлар, оҕуруокка уу куталлар, сыыс ыраастыыллар. Бары тус туһунан анал үлэлээхтэр. Уолаттар эһэлэрин кытта оттууллар. Маны таһынан улахан сиэн сайыҥҥы сынньалаҥ кэмигэр нэһилиэккэ бэриллэр уу ситимигэр иккис сайынын ситиһиилээхтик үлэлээтэ. Билигин 20-тэн тахса ньирэйи, 100-тэн тахса араас көтөрү иитэбит. Манна оҕолорум, сиэннэрим төһүү күүс буолаллар. Сиэннэрбитин күһүн оскуола арыллыыта хамнастыыбыт, төрөөбүт күннэри бэлиэтээн бырааһынньыктары тэрийэбит. Онон сиэннэр уһун сынньалаҥнары, сайыны олус күүтэллэр, Тулунаҕа тардыһаллар.
Ити курдук күөх сирэм Тулунаҕа баар Неустроевтар сылаас уйалара, кыыл-сүөл саҥатынан туолбут уйгулаах тэлгэһэлэрэ сиэннэргэ оҕо саас алыптаах өйдөбүлэ буолан үйэлэргэ хатаныа турдаҕа, үлэ үөрүйэхтэрин иҥэрэн, эбэ, эһэ оскуолата, сылаас таптала олоххо бэлэмнээх дьону таһаарыа буоллаҕа.
Мария Аргунова