«Күүстээх Куо» диэн кэрэ аҥаардар ортолоругар ким сымсатын, күүстээҕин, сылбырҕатын быһаарар Варвара Васильева-Күүстээх Баттаайа аатынан күөн күрэскэ тоҕус кыттааччы кииристэ.
Кинилэр ортолоругар мас тардыһыыга маастар кыргыттар Чурапчыттан Саина Седалищева, Светлана Молукова, улууспут мас тардыһыыга фаворит кыргыттара Вероника Новгородова, Алина Ларионова, Юлия Аргунова, многоборьеҕа күүстээх Саина Егорова, сахалыы ыстаҥаҕа маастарга кандидаттар Диана Федорова, Евгения Адамова кытыннылар.
Бастакы түһүмэххэ – 3х3 сахалыы ыстаныыга – Баатаҕай бастыҥ спортсменката Евгения Адамова 24 м 67 см түһэн инникилээтэ. Иккис түһүмэххэ – 100 м сүүрүүгэ – 11, 35сөк. көрдөрүүлэнэн Саина Седалищева кыайда. Үһүс түһүмэххэ 30 киилэлээх куулу миэстэттэн ыраахха быраҕыыга 2 м 71 см ситиһэн эмиэ Саина Седалищева бастаан, сэниэлээҕин биллэрдэ, иккис миэстэҕэ 2 м 47 см быраҕан – Вероника Новгородова, үһүскэ 2 м 34 м көрдөрүүлээх Алина Ларионова тахсан чахчы күүстээхтэрин дакаастаатылар. Бүтэһик түһүмэххэ – мас тардыһыытыгар Саина Седалищева тэҥнээҕин булбата.
Онон «Күүстээх Куо» күрэс кыайыылааҕынан Чурапчы кыыһа Саина Седалищева ааттанан, 100 000 солкуобай бирииһи тутта.
Светлана Сивцева