Олунньу 26-27 күннэригэр иитиэхтээн таһаарбыт «Ыллаа-туой, уол оҕо» күрэспит 26-с төгүлүн Таатта улууһун олоҥхоһуттар түөлбэлээн үөскээбит Дьүлэй сиригэр ыытылынна. Күрэһи И.Н. Гуляев аатынан оскуола коллектива (дир. О.Н. Гуляева) иилээн-саҕалаан ыытта.
Барыта аҕыс улуустан сүүстэн тахса уол кыттан ырыа түһүлгэтин тартылар. Ол курдук Таатта, Мэҥэ Хаҥалас, Өлөөн, Кэбээйи, Чурапчы, Уус Алдан, Томпо, Хатас (Дьокуускай) сириттэн кытыннылар.
Кылаан кыайыыны ансаамбылларга эмиэ Туора Күөл оскуолатын «Тоҕус Тойон» бөлөҕө, солистарга Тимур Эляков ыллылар уонна сыаналаах бириистэринэн наҕараадаланнылар.
Бастыҥ салайааччынан Кэбээйи улууһун «Чаҕылыс» бөлөҕүн салайааччыта Альбина Бессонова ааттанан Бүөтүр Оҕотоойоп аатынан Кэптэнитээҕи сынньалаҥ киинэ бу күрэс бастакы Гран-при хаһаайына Геннадий Федоров аатынан туруорбут бирииһин тутта.
«Көрөөччү биһирэбилэ» бирииһи Өлөөнтөн Стас Федоров тутта.
«Лауреат лауреатов» бочуоттаах ааты быйыл Төҥүлү оскуолатын уолаттарын бөлөҕө ылла. Онон кэлэр сылга «Ыллаа-туой, уол оҕо» күрэс Төҥүлү сиригэр ыытыллар гына быһаардыбыт.
Биһиги улууспутуттан алта хорсун уол тиийэн бэйэлэрин талааннарын көрдөрөн кэллилэр.
Манна ыытыллыбыт улуустааҕы курэсрит Кылаан кыайыылааҕа – Мүрү 2-с N-дээх орто оскуолатын үөрэнээччитэ Айсиэн Кутуков (сал. У.Е. Стрекаловская) улахан бөлөххө 1-кы ст. лауреат буолла. Айсиэн Кылаан кыайыылаахтан 2 эрэ баалынан хоттордо.
Орто бөлөххө Бэйдиҥэ оскуолатын үөрэнээччитэ Коля Охлопков кыайыылааҕынан таҕыста (сал. Е.П. Румянцева).
Уһун Күөлтэн А.Г. Никитин иитиллээччитэ Эрчим Афанасьев 3-с ст. лауреат буолла.
Кыра бөлөххө эмиэ Уһун Күөл оскуолатын үөрэнээччитэ Айастаан Олесов 1-кы ст. лауреат буолла.
Кэптэниттэн Дамир Прядезников 1-кы ст. дипломант, Эрсаан Кычкин 2-с ст. дипломант буоллулар. Маны таһынан Эрсаан «Надежда конкурса», Дамир «20-с үйэ бастыҥ ырыата» анал бириистэри туттулар.
Күрэс биир сонун көстүүтүнэн бу кэлбит аҕыс улуус землячествотын харчынан бириистэрин туттарыы буолла. Манна биһигиттэн Дамир Прядезников ылла.
Иккис сонун көстүү – 2006 сыллааххс бу күрэскэ Кылаан бирииһи ылбыт Анатолий Михайлов төрөппүт уола кэлэн кыттан, 2-с ст. лауреат буолан барда (Чурапчы). Онон аны сиэн уолаттар көстөн эрэллэр. Бу биһиги күрэспитигэр эрэли үөскэтэр көстүү.
Быйылгы күрэс бириистэрэ улаханынан сөхтөрдө, барыта спонсорство көмөтүнэн ыытылынна. Ол курдук, солист 50 тыһ. суумалаах телевизоры ылла, бөлөх 25 тыһ. солк. бэлиэтэннэ. «Лауреаттар лауреаттара» – велосипед о.д.а.
Үлэлээн ааспыт Туора Күөлүм оскуолатын коллективыгар, директор О.Н. Гуляеваҕа, Дьүлэй нэһилиэгин баһылыгар О.Д. Осиповка (бэйэтинэн кэлэн ыытыста), сынньалаҥ киинин директорыгар Н.П. Аянитоваҕа махталбын биллэрэбин уонна бэйэм улууһум үөрэҕин салалтатыгар, суоппарбар Г.К. Никитиҥҥэ, барсыбыт салайааччыларбар, оҕолорум төрөппүттэригэр, уолум аатынан бириис туруорбут сынньалаҥ киинин директорыгар В.Ф. Прядезниковка эмиэ улахан махталбын тиэрдэбин.
Зинаида Лугинова, «Ыллаа-туой, уол оҕо» бырайыак ааптара
«Таатта» хаһыат телеграм-каналыттан хаартыскалар