Бүгүн Уус Алдан улууһун саҥа талыллыбыт баһылыга Василий Алексеев солотугар киирэр тэрээһинэ буолла. Биллэрин курдук балаҕан ыйын 14 күнүгэр кини улуус баһылыгын талыы быыбарыгар баһыйар үгүс куолаһы ылбыта. Бу иннинэ кини Бороҕон нэһилиэгин баһылыгынан икки болдьоххо үлэлээбитэ.
В.В. Никифоров-Күлүмнүүр аатынан култуура дыбарыаһын саалатын толору мустубут улуус олохтоохторо өрөгөйдөөх муусука доҕуһуолунан киирбит Василий Петровиһы уонна кэргэнин Ольга Дмитриевнаны уруйдаан-айхаллаан көрүстүлэр. Уус Алданнааҕы Территориальнай быыбар хамыыһыйатын бэрэссэдээтэлэ Александра Аянитова саҥа баһылыкка улуус баһылыга буолбутун бигэргэтэр дастабырыанньаны туттарда. Оттон Василий Алексеев улууһун олохтоохторун иннигэр улуус кэскиллээх суолларын, байылыат олоҕун, сайдыылаах сарсыҥҥытын туһугар күүһүн, кыаҕын толору ууран туран үлэлииргэ андаҕайда. Ол кэннэ улуус баһылыгын ытык бэлиэтин биир дойдулаахпыт «Полярная звезда» орден кавалера, РФ уонна СӨ үтүөлээх энергетига, РФ уонна СӨ бочуоттаах энергетига, Уус Алдан улууһун уонна аҕыс хоту улуус бочуоттаах олохтооҕо Николай Макарович Парников туттарда. Салгыы Василий Петрович улуус 2030 сылга диэри сайдыытыгар соруктарын, былааннары туһунан дакылаат оҥордо.
Солотугар саҥа киирбит баһылыгы СӨ Бырабыыталыстыбатын бэрэссэдээтэлин солбуйааччы Сергей Местников, Ил Түмэн бэрэссэдээтэлин бастакы солбуйааччы Александр Жирков, «Биир ньыгыл Россия» баартыйа Саха сиринээҕи салаатын исполкомун бэрэссэдээтэлэ Надежда Селютина, улуус дьокутааттарын Сэбиэтин бэрэссэдээтэлэ Иннокентий Аммосов, улуус нэһилиэктэрин баһылыктара, улуус баһылыгынан үлэлээбит Валериан Троев, Алексей Федотов эҕэрдэлээтилэр. Онтон Василий Петрович бар дьонугар махталын тиэртэ.
Улууһу салайар «муоһа» саҥа киһиэхэ туттарылынна. Сомоҕолоһуу, түмсүү туһугар үлэлииргэ алгыһы ылла. Саҥа кэрдиис кэм саҕаҕа арылынна.
Афанасий Сектяев