Илин эҥэр уонна киин улуустар баһаары утары сулууспаларын үлэһиттэрин XXII спартакиадалара түмүктэннэ.
Үс күннээх тыҥааһыннаах киирсиилэр, уһулуччу көрдөрүүлэр, чаҕылхай түгэннэр кэннилэриттэн кыттыбыт аҕыс хамаандаттан үһүс миэстэни Нам улууһун сулууспата ылла. Бүтэһик көрүҥҥэ диэри ханнык улуус миэстэлэһэрэ биллибэт этэ: Хаҥалас уонна Нам хамаандалара тэҥ көрдөрүүлээх испиттэрэ, бүтэһик искусственнай иһиттэн ууну оботторон умулларарга бэлэмнэниигэ (боевое развертывание) Нам улууһа үчүгэй көрдөрүүнү ситиһэн үһүс миэстэҕэ тигистэ. Иккис миэстэҕэ – Таатта улууһа. Дьэ уонна кыайыы өрөгөйүн Уус Алдан улууһун баһаарынай сулууспатын хамаандата ылыан ылла. Кинилэр спартакиада 10 көрүҥүттэн 6-тыгар бастаабыттар.
Спартакиада түмүгүнэн анал ааттарга наҕараада туттартаатылар, Уус Алдан улууһун баһаарынай сулууспатын бэтэрээн үлэһиттэрин ааттарыттан эдэр кэскиллээх байыастарга: Валентин Громовка (Уус Алдан), Владислав Поповка (Таатта улууһа) туттардылар, “Кыайыыга дьулуурун иһин” анал ааты Елизар Христофоров (Мэҥэ Хаҥалас улууһа) ылла, “Спартакиада бастыҥ спортсмена” анал ааты Иннокентий Бережнев (Уус Алдан улууһа) сүктэ.
Үс миэстэлэспит хамаанда балаҕан ыйыгар Дьокуускай куоракка ыытыллар өрөспүүбүлүкэтээҕи күрэскэ кыттыаҕа. Биир дойдулаахтарбытыгар ситиһиини!
Анатолий Кириллин