ДьУоКХ Уус Алданнааҕы филиалын эрдэтээҕи иһитиннэриитинэн быйыл оттук сезона балаҕан ыйын 7 күнүттэн саҕаланар диэн этэ, ол эрээри бүгүҥҥү күҥҥэ диэри сорох хочуолунайдар оттулла иликтэрин туһунан ыйытыылар олохтоохтортон киирэ тураллар.
Бу туһунан ДьУоКХ улуустааҕы филиалын кылаабынай инженерэ Василий Рожинтан ыйыппыппытыгар:
– «СР ДьУоКХ» ГУТ салалтатын бирикээһинэн биһиги балаҕан ыйын 7 күнүттэн оттук сезонун саҕалаабыппыт. Улуус үрдүнэн барыта 46 хочуолунайдаахпыт, 5 тепловой пууннаахпыт, олортон билигин 28 хочуолунай уонна 3 тепловой пуун оттуллан үлэлии тураллар. Хаалбыт 18 хочуолунайга уонна 2 тепловой пууҥҥа уоттара холбонноҕуна, бүгүҥҥүттэн ититии толору бэриллиэҕэ»,
– диэн иһитиннэрдэ.
Биллэрин курдук, «СР ДьУоКХ» ГУТ уотунан уонна гааһынан хааччыйар тэрилтэлэргэ иэскэ киирэн олорор, онуоха бэҕэһээ СӨ Баһылыгын уонна Бырабыыталыстыбатын пресс-сулууспата ДьУоКХ тэрилтэтигэр бюджеттан 700 мөл. солк. суумалаах кирэдьиити биэрии туһунан дьаһал сөбүлэһии бүтэһик түһүмэҕэр сылдьарын уонна Сбер 4 млрд солкуобайдаах коммерческай кирэдьиити биэрэрин туһунан иһитиннэрдэ.
Манна даҕатан эттэххэ, Уус Алдан улууһун дьаһалтата балаҕан ыйын 4 күнүгэр быйылгы оттук сезонун балаҕан ыйын 11 күнүгэр көһөрөргө диэн дьаһал таһаарбыта. Онон Уус Алдаҥҥа оттук сезона бүгүҥҥүттэн толору саҕаланар.