Бырабыыталыстыба отчуотун Уус Алдан улууһун олохтоохторун иннилэригэр туруорар бастакы бөлөх үлэтин бүгүн Баатаҕай нэһилиэгиттэн саҕалаата. Бөлөҕү СӨ культураҕа уонна духуобунай сайдыыга миниистирин солбуйааччыта Мария Турантаева салайар.
Олохтоохтор сүнньүнэн чааһынай дьиэлэри ититии ситимигэр холбооһун, айан суолун өрөмүөннээһин, бөһүөлэги иһэр уунан хааччыйыы, сүөһү-сылгы иитэр дьоҥҥо оттуур ходуһаны көрүү, эдэр исписэлиистэргэ уопсай дьиэни тутуу, олохтоох култуура дьиэтин өрөмүөннээһин, саҥа оскуола тутуута уо.д.а. кыһалҕалаах боппуруостарыгар тохтоотулар. Маны таһынан олохтоохтор киэн туттар биир дойдулаахтарыгар, чулуу историк, Саха АССР култууратын үтүөлээх үлэһитэ Дмитрий Дмитриевич Петровка пааматынньыгы, өрөспүүбүлүкэҕэ маассабай спорт көрүҥүн төрүттээбит Николай Тарскай төрөөбүт дойдутугар ГТО пуунун тутууну туруорустулар.
Түмүккэ Баатаҕай нэһилиэгин олохтоохторо СӨ Бырабыыталыстыбатын сыллааҕы үлэтин отчуотун истэн-дьүүллэһэн баран, «үчүгэйинэн» сыаналаатылар, диэн улуус дьаһалтатын пресс-сулууспата иһитиннэрэр.