Хас биирдии киһи төрөөбүт дойдулаах, үөскээбит төрүт дьонноох, дурда-хахха буолар дьиэ кэргэннээх. Уол оҕо утумнаан иһэр удьуорун билиэхтээх диэн санаанан салайтаран, быйыл 5-с кылааска гимназия боруогун атыллаабыт уолаанчыктар төрүччүлэрин үөрэтэн, учууталларын, төрөппүттэрин иннилэригэр киэн тутта кэпсээтилэр.
“Удьуор утума” тэрээһин сахалыы сиэринэн алгыһынан саҕаланна. Алгысчыт Айаал Аргунов Үрдүк Айыылартан көрдөһөн, уолаанчыктарбытыгар алгыс тылын анаата. Салгыы ыалдьыттары гимназия аактабай саалатыгар ийэлэр дэйбиирдээх көрүстүлэр, ыалдьыттар сонун киэргэтиини көрөн сэҥээрбиттэрин биллэрдилэр.
Тэрээһини төрөппүттэр Елизавета Захарова уонна Варвара Тимофеева иилээн-саҕалаан ыыттылар. Үөрүүлээх түһүлгэни уолаанчыктар Наталия Бурцева туруорбут уус-уран дьүһүйүүтүнэн арыйдылар. Кылгастык бэйэлэрин туһунан, хантан силистээхтэрин хоһоонунан ааҕан иһитиннэрдилэр. Ол курдук, уолаанчыктар Мүрү, Хоро, Байаҕантай, II Лөгөй, Өспөх, Чэриктэй, Суотту нэһилиэктэриттэн, ону таһынан Өлөөн улууһуттан, Туймаада хочотуттан төрүттээхтэрин биллибит. Салгыы хас биирдии уол төрүччүтүн уонна киэн туттар аймахтарын туһунан сиһилии кэпсээтилэр.
Тэрээһин кэмигэр уолаанчыктар бары ылбаҕай ырыа ыллаатылар (салайааччылар – Айыына Стручкова, Марфа Ефимова), эрэкэ-дьэрэкэ үҥкүү (солист – Айдар Васильев, салайааччы Платон Стрекаловскай) көрдөрөн көрөөччүлэри сэргэхситтилэр. Салгыы ийэлэр кэрэ үҥкүүлэринэн көрөөччүлэр интэриэстэрин тартылар.
Ону таһынан уолаанчыктар – Ньургун Слепцов, Айтал Прокопьев, төрөппүттэр ааттарыттан эйэҕэс эбэ Евдокия Васильева ылбаҕай ырыанан тэрээһини киэргэттилэр. Айсен Троев Сергей Васильев «Үөлэн Хардааччы» олоҥхотуттан быһа тардан ааҕан сөхтөрдө.
Биир сонун нүөмэринэн аҕалар «Уол оҕо анала» хоһоону дорҕоонноохтук ааҕыылара буолла.
Тэрээһин иккис чааһыгар төрөппүттэр саха норуотун төрүт оонньууларын уолаттарга билиһиннэрдилэр, оонньоттулар. Уолаттар көхтөөхтүк оонньоон астыннылар, олус интэриэһэргээтилэр. Гимназия директора Валерий Рожин, бырайыак ааптара Наталия Бурцева, куратор Айыына Стручкова, төрөппүт кэмитиэтин бэрэссэдээтэлэ Сардаана Готовцева уо.д.а. тэрээһин үрдүк таһымҥа ааспытын бэлиэтээтилэр, тэрийээччилэргэ махтал тылларын эттилэр. Уолаанчыктар төрүччүлэрин үөрэтэн элбэҕи билбиттэрин, тэрээһинтэн астыммыттарын биллэрдилэр.
Бэһис кылаас кэлэктиибэ гимназия таһымыгар ыытар бастакы тэрээһинэ буолан, уолаттар, төрөппүттэр түмсүүлээх буолалларыгар олук уурар. «Удьуор утума» бырайыак уол оҕону иитэр-сайыннарар, дьиэ кэргэни, аймах дьону түмэр, биир ураты тэрээһин буоларынан инникитин да салҕана турарыгар эрэнэбит!
Айыына Стручкова, 5-с кылаас куратора, нуучча тылын уонна литературатын учуутала