Сааскы сынньалаҥ кэмигэр Саха сириттэн «Хикари» туристическай фирма тэрийиитинэн 445 киһилээх делегация Китай Норуодунай Республикатыгар Бейдайхэ оройуонун норуотун консультативнай сэбиэтин чилиэнэ, «Күөх халлаан» туристическай фирма генеральнай директора Дмитрий Чан Жипен салайааччылаах хамаандата ыытар «Хрустальный Лотос» Аан дойдутааҕы норуоттар икки ардыларынааҕы күрэскэ ситиһиилээхтик кыттан төрөөбүт дойдуларыгар төннөн айаннаан иһэллэр.
Делегацияҕа Тааттаттан, Мэҥэ Хаҥаластан, Чурапчыттан, Уус Алдантан, Үөһээ Бүлүүттэн, Сунтаартан, Ньурбаттан, Өлүөхүмэттэн, Үөһээ Дьааҥыттан, Дьокуускай куораттан киирэн кыттыннылар. Уус Алдан Бороҕонуттан 47 киһилээх делегация кытынна. Ульяна Ноговицына салайааччылаах «Кэнчээри» үҥкүүгэ кыра бөлөҕүттэн «Күн сардаҥата», «Хотугу көстүү» үҥкүүлэрэ иккиэн 2-с истиэпэннээх лауреат, Аида Назарова, Ульяна Петрова салайааччылаах Бороҕоннооҕу оҕо искусствотын оскуолатыттан «Оҕо саас» үҥкүү ансаамбыла «Хомус» үҥкүүтэ 2-с истиэпэннээх лауреат, Ольга Петрова салайааччылаах «Тойон Мүрү» үҥкүү кэлэктиибин үҥкүүһүттэрэ Максим Васильев, Аида Назарова, Ульяна Петрова «Дьөһөгөй» үҥкүүлэринэн 3-с истиэпэннээх лауреат буоллулар.
Оттон бу күрэскэ хореография салаатыгар Ульяна Ноговицына салайааччылаах Мүрү 2-с №-дээх уонна Бороҕоннооҕу оҕо искусствотын оскуолатын үөрэнээччилэрэ – «Оhуор» үҥкүү ансаамбыла икки үҥкүүнү толорбуттарыттан «Дьөһөгөй оҕото» үҥкүүлэрэ муҥутуур кыайыылааҕынан буолан Гран-При үрдүк аатын ылары ситистилэр, иккис «Тыас-уус» үҥкүүлэрэ 1-кы истиэпэннээх лауреат буолла.
Оҕолор сөҕүмэр ситиһиилэнэн, үөрэн-көтөн, киэн туттууга, махталга куустаран төрөөбүт дойдуларыгар айаннаан иһэллэр.
Бу сырыыбыт айана кулун тутар 21 күнүттэн саҕаламмыта. Аллараа Бэстээхтэн поеһынан айаннаан Благовещенскай куоратынан границаны туораан, Хейхе, Харбин куораттарынан күүлэйдээн, Бейдайхэҕа биэс хоннубут, Улуу Кытай истиэнэтин, ытык сирдэрин, храмнарын көрөн, араас пааркаларыгар, Саһархай муора кытылынан күүлэйдээн, салгынынан тыынныбыт. Куонкуруспут кулун тутар 28 күнүгэр биэс блогунан араарыллан, Бейдайхэ Циньхуандаоҕа биир улахан тыйаатырыгар буолла. Биһиги – бастакы, сорохторбут үһүс блокка кытынныбыт, бу блоктарга үҥкүү, цирка, тыйаатыр хайысхалара кытыннылар. Күрэскэ Монголияттан, Кытайтан, Арассыыйа араас регионнарыттан Москваттан, Амуртан, Тындаттан уо.д.а. сиртэн барыта 900-тэн тахса кыттааччы кытынна.
Икки кэнники күҥҥэ 22 мөлүйүөн кэриҥэ киһи олорор Улуу Кытай сыантырыгар Пекиҥҥэ сырыттыбыт. Бастакы күн Храм Небо, эбиэт кэннэ аан дойдуга аатырбыт циркэлэрин көрөн сөхтүбүт-махтайдыбыт. Иккис күммүтүгэр саҥардыы 2021 сыллаахтан арыллан үлэлиир «Universal Studio Пекина» пааркаҕа аттракционнарга хатааhылаан, араас мультиктар, киинэлэр дьиҥнээх геройдарын кытта кинилэр эйгэлэригэр киирэн таҕыстыбыт, парадтарын, представлениеларын көрдүбүт-иһиттибит. Оҕолор телевизорынан эрэ көрөр геройдарын, мультиктарын, киинэлэрин илэ харахтарынан көрөн астыннылар.
Оҕолор сааскы сынньалаҥнарыгар сайдыылаах сири-дойдуну билэн-көрөн сайыннылар, дуоһуйа сынньаннылар.
Үрдүк ситиһиилээх, кыайыы көтөллөөх дьиэбитигэр төннөн иhэрбититтэн астынабыт, киэн туттабыт.
Бу айаммытыгар тэҥҥэ сылдьан оҕолору көрсүбүт төрөппүттэрбитигэр, оҕолорбут оскуолаларын директордарыгар, транспорынан, бензининэн хааччыйбыт үөрэх, култуура салалталарыгар салайааччылар Федор Татариновка, Эльза Киренскаяҕа, бэйэтин сувенирынан спонсордаабыт Мүрү нэһилиэгин депутатыгар, «Фотодекор» студия хаһаайыныгар Александр Гоголевка, айаммытын тэрийэн ыыппыт директордарбытыгар Борис Заровняевка, Алексей Мигалкиҥҥа, Василий Парниковка барҕа махталбытын тиэрдэбит.
Ульяна Ноговицына, Уус Алдан делегациятын салайааччыта