Уус Алдан ыччатын уонна устудьуоннарын «Бэрт Хара» холбоһугун актыбыыстара уонна кинилэр доҕотторо Үөһээ Дьааҥы ыччатын «Хайа Сахалара» түмсүүтэ үтүө үгэстэрин быһыытынан бу күннэргэ улууспутугар кэлэн тимуровскай үлэҕэ туруннулар.
Эдэр дьон бүгүн Сыырдаах бөһүөлэгэр Кыыс Хаҥа алааһыгар сылдьан Бэрт Хара пааматынньыгын хаарын ыраастаатылар. Ыччакка Бэрт Ууһун баһылыга Илья Ильин уонна олохтоох Василий Копырин ытык сир туһунан кэпсээтилэр, алгыс тылларын анаатылар.
Салгыы Василий Явловскай салайааччылаах тиийэн анал байыаннай дьайыы бэтэрээнэ Павел Ивановка булууска муус уктулар, нэһилиэк аҕам саастаах ыалыгар Дрищевтарга дьиэлэрин хаарын түһэрдилэр.
Мантан киэһэ ыччат олохтоохтору эдэрдии эрчимнээх кэнсиэринэн сэргэхситиэхтэрэ. Ыччат маннык программалаах сарсын улууспут киинигэр, өйүүн Кэптэни бөһүөлэгэр сылдьыахтара.
Мария Аргунова