Байыаннай дьайыыга биир дойдулаахтарбыт, уолаттарбыт этэҥҥэ сылдьалларын туһугар “Саха волонтер” хамсааһын тохтообот кыһамньытын ууран, өрөспүүбүлүкэ дьонун-сэргэтин түмэ тардан, улахан көмөнү оҥорор.
Бүгүн, алтынньы 21 күнэ – “Саха волонтер” хамсааһын координационнай киинэ Москва куоракка тэриллибит күнэ. Онон сиэттэрэн улууспутугар волонтердар хамсааһыннара бүгүн хайдах үлэлии олорорун билсиэҕиҥ.
Саргылана Никитина, улуустааҕы дьиэ кэргэни, ыччаты өйүүр психологическай киин салайааччыта:
– Быйыл улуус делегацията анал байыаннай дьайыыга сылдьар уолаттарбытыгар гуманитарнай көмөнү тиэрдэ барарыгар анаан улуус баһылыгын социальнай боппуруоска солбуйааччы Григорий Аргунов, дьиэ кэргэн отделын салайааччы Валентина Андросова иилээһиннэринэн, улуустааҕы “Эрэл” фонда үбүлээн флис таҥас ылыллан көстүүм тигиитигэр үлэ бара турар.
Манна буоларын курдук, Бороҕон, Балыктаах, Тулуна, Эһэлээх, Танда, Кылаайы, Кэптэни, Сыырдаах, Элэһин, Майаҕас, Дүпсүн, Бэйдиҥэ, Чараҥ бөһүөлэктэрэ үһүс сылларын тиксэллэр, актыыбынайдык кытталлар. Сылын ахсын нэһилиэктэр көмөҕө эбиллэллэр, быйыл Баатаҕай уонна Уһун Күөл бөһүөлэгэ киирдилэр.
Маны таһынан Лөгөй, Түүлээх нэһилиэктэригэр оҕолору кыттыһыннаран харысхаллары эбии оҥоро олороллор. Мүрү, Найахы нэһилиэгин иистэнньэҥнэрэ анал шевроннарга улуус гербэтин, Саха сирин былааҕын кытары уолаттар бэйэлэрин көрдөһүүлэринэн руна суругунан “Айыыларым араҥаччылааҥ” диэн алгыс тылын быысапкалаан бэлэмнии сылдьаллар.
Таҥастар выкройкаларын барытын биһиги филиалбыт үлэһиттэрэ Таисия Базарова, Доминика Егорова, Елена Слепцова ааҕан-суоттаан, ньэмиэтин оҥорон, бэлэмнээн нэһилиэктэргэ ыыталыыбыт.
Үлэлэһэ олорор хас биирдии бөһүөлэкпитигэр волонтердар хамсааһыннарыгар кыттыһар тэрилтэлэрбит, олохтоохтор, иистэнньэҥнэр бука бары саба түһэн үлэни кыайа-хото тутабыт.
Екатерина Захарова