Бүгүн улууспут оскуолаларын кыһыл, үрүҥ көмүс мэтээлинэн бүтэрбит выпускниктары чиэстиир үөрүүлээх тэрээһин буолла.
2024-2025 үөрэх дьылыгар улуус 21 орто оскуолатын 270 үөрэнээччи бүтэрэн бу күннэргэ орто оскуоланы бүтэрбиттэрин туоһулуур аттестаттарын туттулар. Бу оҕолор ортолоругар улуус, республика киэн туттар үөрэнээччилэрэ, араас таһымнаах научнай-практическай конференциялар, ааҕыылар, олимпиадалар кыайыылаахтара, биллэр спортсменнар бааллар.
Бүгүн алта үөрэнээччи кыһыл, 20 үөрэнээччи үрүҥ көмүс мэтээли улуус баһылыгын эбээһинэһин толорооччу Илья Артамонов илиититтэн долгуйа туттулар. Кыһыл көмүс мэтээли Г.В. Егоров аатынан Мүрү 1-гы №-дээх орто оскуолатын выпускницата Алгыстаана Парникова, Лөгөйдөөҕү лицей-интернат выпускнига Оскар Пермяков, Мүрү 2-с нүөмэрдээх орто оскуолатын выпускниктара Надежда Алексеева, Владимир Мигалкин, Лөгөйдөөҕү лицей-интернат выпускницата Сайаана Винокурова, В.В. Алексеев аатынан Мүрүтээҕи уолаттар гимназияларын выпускнига Николай Аммосов туттулар.
Салгыы үрүҥ көмүс мэтээл хаһаайыттара Мүрүтээҕи уолаттар гимназияларын выпускнига Дмитрий Эверстов, Лөгөйдөөҕү лицей-интернат выпускницалара Люба Карамзина, Вероника Ушницкая, Дарина Бурнашева, И.Н. Жирков аатынан Дүпсүн орто оскуолатын выпускницалара Дайаана Афанасьева, Динара Сивцева, В.Ф.Афанасьев-Алданскай аатынан Чэриктэй орто оскуолатын выпускниктара Сарыала Алексеева, Игорь Федоров, И.И. Гоголев-Дыргыабай аатынан Найахы орто оскуолатын выпускницата Ангелина Тимофеева, Мүрү 2-с нүөмэрдээх орто оскуолатын выпускницалара Нарыйаана Троева, Элеонора Дегтярева, Анастасия Жиркова, В.М. Прокопьев аатынан Тумул орто оскуолатын выпускницалара Карина Алексеева, Айыына Афанасьева, Суотту орто оскуолатын выпускниктара Виолетта Ноговицына, Эмма Егорова, Валентин Макаров, Н.Н. Тарскай аатынан Баатаҕай орто оскуолатын выпускницата Римма Тимофеева, Мындааба спортивнай орто оскуолатын выпускницата Камила Тролукова, Г.В. Егоров аатынан Мүрү 1-гы №-дээх орто оскуолатын выпускнига Любомир Борисов ааттаннылар.
Ааспыт үөрэх дьылыттан улуус баһылыга биир кэлим экзамены 90-100 баалга туттарбыт үөрэнээччилэргэ, кинилэри бэлэмнээбит учууталларга харчынан бириэмийэлэри олохтообута. Быйылгы үөрэх дьылыгар Г.В. Егоров аатынан Мүрү 1-гы №-дээх орто оскуолатын выпускницата, биир кэлим эксээмэҥҥэ нуучча тылын 97 баалга туттарбыт Алгыстаана Парниковаҕа дохсун тыаһын доҕуһуолунан 50 000 солк. суумалаах сертификаты уонна дьаһалы туттардылар. Маннык суумалаах сертификатынан Алгыстаананы нуучча тылыгар үөрэппит учуутала Елена Рожина наҕараадаланна.
Салгыы эҕэрдэ тылы улуустааҕы үөрэх салалтатын начаалынньыгын солбуйааччы Тимофей Григорьев этэн туран, медалистар төрөппүтэригэр, кылаас салайааччыларыгар махтал суруктары туттарда. Мэтээлинэн бүтэрбит выпускниктар ааттарыттан харда тылы Валентин Макаров, төрөппүттэр ааттарыттан Спиридон Аммосов эттилэр.
Мария Аргунова