Быйыл балаҕан ыйын 1 күнүгэр сайыҥҥылыы салгыннаах сылаас күн сатыылаата. Мүрү 1-гы №-дээх орто оскуолатыгар – улуус саамай улахан оскуолатын 621 үөрэнээччитигэр 2025-2026 үөрэх сылын бастакы чуораана чугдаарда.
Быйыл оскуола боруогун атыллыыр бастакы кылаас 39 үөрэнээччилэрэ маҥнайгы учууталлара Ольга Пестрякова, Христина Охлопкова илиилэриттэн сиэттиһэн долгуйа кэчигирэһэн турдулар. Оттон 11 кылаас выпускниктарын педагогтар Люция Бурцева, Анастасия Москвитина быйыл салайан, олох киэҥ аартыгар атаарыахтара.
Быйылгы үөрэх саҥа сылынан улуус баһылыгын э.т. Илья Артамонов, Мүрү нэһилиэгин баһылыга Прокопий Румянцев, үөрэх управлениетын начальнига Степан Литвинцев эҕэрдэлээтилэр, билии, үөрэх саҥа дабайыыларыгар үрдүк ситиһиини баҕардылар. Быйылгыттан улуус оскуолаларыгар улуус историятын, сирин-уотун туһунан сырдатар, кыраайы үөрэтэргэ анал саҥа пособие тахсыбытынан эҕэрдэлээн туран, үүнэр көлүөнэ патриотическай тыыҥҥа иитиллэригэр баҕа санаатын тириэртэ.
Оскуола директора Петр Баханов ааспыт үөрэх сылын бастыҥ үөрэнээччитин, нуучча тылыгар 97 баалы ылбыт Алгыстаана Парникованы киэн тутта ааттаата. Итиэннэ оскуола выпускнига, мецената Роман Готовцев, кини аатынан анал сквер Бороҕоҥҥо аһыллыбытын билиһиннэрэн туран, кини кэргэнэ оскуола бэтэрээн учуутала Полина Ивановна Готовцева аатыттан оскуола туйгун үөрэнээччитигэр Айыллаан Ноговицыҥҥа ноутбук туттарда.
“Кэнчээри” ансаамбыл иитиллээччилэрэ Киргизияттан оҕо лааҕырыгар сынньанан кэлэн, истиҥ эҕэрдэлэрин “Якутяночка” ырыаны үрдүк таһымнаахтык толорон эҕэрдэлээтилэр.
Оскуола бэтэрээн учуутала, 45 сыл устата химия учууталынан үлэлээбит СӨ үтүөлээх учуутала Светлана Ушницкая үөрүүлээх линейкаҕа кыттыыны ыла турар Мүрү 1-гы №-дээх орто оскуолатын бастыҥ выпускниктарын – улуус баһылыгын э.т. Илья Артамоновы, Мүрү нэһилиэгин баһылыгын Прокопий Румянцевы, оскуола үөрэх чааһыгар дириэктэри солбуйааччытын Анна Артамонованы киэн тутта ааттаан туран, мустубут үөрэнээччилэр маннык курдук ситиһиилээх үлэһит, салайааччы, убаастанар киһи буолалларыгар баҕа санаатын тириэртэ.
Түмүккэ, оскуола бастыҥ үөрэнээччилэрэ Максим Потапов, Жанна Иванова, Евгений Бочкарев, о.д.а. махтал суругунан наҕараадаланнылар. Үүммүт саҥа үөрэх сыла оскуола бары үөрэнээччилэригэр, учууталларыгар үрдүк ситиһиилээх, дабайыылаах буоллун.
Светлана Сивцева