Билиҥҥи кэмҥэ технологическай сайдыы олус түргэнник иннин диэки хардыылаан иһэр. Ону батыһан олохпут тэтимэ эмиэ сыыдамсыйда. Ол иһин хайа эйгэҕэ техническай сэбилэниини күүһүрдүү соруга турда.
Бүгүн С.С. Васильев-Борогонскай аатынан улуустааҕы киин бибилэтиэкэҕэ оннук бэлиэ түгэн буолла. Ол курдук киин бибилэтиэкэ “Дьиэ кэргэн” национальнай бырайыак иһинэн “Саҥа көлүөнэ бибилэтиэкэтэ” бырагыраамаҕа кыттан 14 мөл. 800 тыһ. солк. грант ылан, федеральнай модельнай диэн статустанна. Онон бүгүн грант харчытынан ылыллыбыт билиҥҥи кэм ирдэбилигэр толору сөп түбэһэр тэриллэри билиһиннэрии буолла. Ол курдук чугас эргин суох планетарнай сканер киһи сөҕөр эпэрээссийэлэрин оҥорор. Ону тэҥэ компьютердар, 3D принтер, VR-ачыкылар, сынньалаҥ хоһугар анаан остуол оонньуулара о.д.а. ылыллыбыттар.
Онон бибилэтиэкэҕэ дьиэ кэргэнинэн ааҕа эрэ буолбакка, сынньана кэлиэххэ, бэйэҕэ сөптөөх, табыгастаах өҥөнөн эмиэ туһаныахха сөп. Аныгы кэм бибилэтиэкэтэ саҥа олох хаамыытыгар олорсон иһэр аналлаах. Бороҕоҥҥо оннук бибилэтиэкэ баар буолла. Кэлиҥ, сылдьыҥ, көрүҥ.
Үөрүүлээх тэрээһиҥҥэ улуус баһылыга Василий Алексеев, улуус дьокутааттарын Сэбиэтин бэрэссэдээтэлэ Иннокентий Аммосов, улуус дьокутааттара, тэрилтэ салайааччылара кытыннылар.
Бу бэлиэ күҥҥэ биир ураты түгэн холбоһон биэрдэ. Сарсын бэлиэтэнээри турар СӨ Судаарыстыбаннаһын күнүнэн 21 оҕо РФ гражданнара буолбуттарын туоһулуур пааспардары туттулар. Оҕолор бу күнү бэйэлэрин олохторун умнуллубат түгэнин курдук бэлиэтэниэхтэрэ. Кинилэр пааспардарын улуус баһылыга Василий Алексеев илиититтэн туттулар.
Афанасий Сектяев