Бу күннэргэ Уус Алдан улууһун делегацията анал байыаннай дьайыыга сылдьар биир дойдулаахтарбытыгар гуманитарнай көмөнү тиэрдэ айаннаата. Делегация улууспут дьоно, волонтердар, тэрилтэлэр, уопсастыбаннай хамсааһыннар бары түмсэн ыыппыт көмөлөрүн, үтүө баҕа санааларын, алгыстарын уолаттарбытыгар тиксэриэхтэрэ.
Нэһилиэнньэттэн киирэр көмөнү улуус дьаһалтатын ыччакка, социальнай боппуруостарга уонна спорка отделын үлэһиттэрэ кииннээтилэр. Күн бүгүн улуус дьахталларын сүбэтин, «Сэргэх олох», I Хоро нэһилиэгин ийэлэрин, «Умсулҕан» коллекционердар түмсүүлэрэ, Өспөх, Курбуһах, Хоро, Суотту, Бороҕон, Найахы, II Лөгөй нэһилиэктэрин олохтоохторо, Мүрүттэн «Маяк» түөлбэ, «Мүрүчээнэ» оҕо саадын, Мүрү 2-с №-дээх орто оскуолатын коллективтара, улуустааҕы киин балыыһа, о.д.а. бэйэлэрин көмөлөрүн киллэрдилэр.
Маны сэргэ биир дойдулаахпыт Михаил Колодезников уһуннук харайыллар хатарыллыбыт убаһа этин 218 упаковканы бэлэмнээн биэрдэ. Убаһа этинэн улуустааҕы тыа хаһаайыстыбатын управлениета хааччыйда. Мүрү нэһилиэгин олохтоохторо Бережновтар эдэр дьиэ кэргэн бэйэлэрин баҕа санааларыттан биир дойдулаахтарбытыгар кус ыыттылар. Бэйдиҥэ орто оскуолатын интернатын иитиллээччилэрэ алгыс тыллаах харысхаллары оҥорон туттардылар. «Мүрү саһарҕата» хаһыат байыастарга дойдуларын сонунун кэпсиир хаһыаттары ыыттылар.
Оттон «Помощь волонтера бесценна» улуустааҕы ыстаап, «Швейный патриот» волонтердара уолаттарбытыгар быһаччы наадалаах малы-салы тигиигэ тигинэччи үлэлээн, сүүһүнэн кэмпилиэктэри бэлэмнээтилэр.
Бу курдук барыбыт үтүө баҕа санаата, кыһамньыта уолаттарбытын араҥаччылыыр туһугар түмүлүннэ.
Екатерина Захарова