Кулун тутар 26 күнүгэр улуус баһылыга Василий Алексеев Курбуһах нэһилиэгин олохтоохторун кытары көрүстэ.
Окоемовка бөһүөлэгэр тутулла турар арыы оҥорор сыахха сылдьан үлэ хаамыытын билистэ. Тутуу үбэ-харчыта сэтинньигэ көрүллүбүтэ, халлаан сылыйда да үлэ салгыы ыытыллан, саҥа сыаҕы кылгас кэм иһигэр олоххо киллэрэргэ сорук турар. Олохтоохтор сыахха үүт астан араас бородууксуйаны оҥорон таһаарар анал тэриллэри туруорсаллар.
Салгыы Василий Петрович Уус Күөлүгэр сылдьан, Семен Аммосов салайар кэтэх хаһаайыстыбатын үлэтин-хамнаһын билистэ. Төрүт дьарыгы ыһыктыбакка, сүөһү иитиитинэн дьарыктанан, дьоҥҥо холобур буоларын бэлиэтээтэ.
Көрсүһүү сүрүн чааһа «Сандал» сынньалаҥ киинигэр ыытылынна. Дьон-сэргэ нэһилиэк инники сайдыытыгар сыһыаннаах боппуруостары аһаҕастык туруорустулар.
Уус Күөлүгэр ититии ситимигэр билигиҥҥи туругунан 53 ыал холбоммут. Олохтоохтор ити үлэ салгыы ыытыллан, хаалбыт ыаллары ититии ситимигэр холбуур боппуруоһу күүскэ туруорустулар. Итиэннэ эдэр ыаллар тыа сиригэр олохсуйалларын инниттэн дьиэ тутталларыгар субсидия көрүллэрэ буоллар диэн санааларын эттилэр. Чааһынай ыаллар уһаайбаларын иһигэр турар уот остуолбаларын көһөрөргө, улуус киинигэр Бороҕоҥҥо элбэх киһи кэлэр-барар, онно гостиница аҕыйаҕа кыһалҕалары үөскэтэрин эттилэр. Улууспут биллэр марафон сүүрүүктэрэ Анатолий Заболоцкай, Леонид Сакварс, Иван Бурнашев ааттарынан ыытыллар сааскы сүүрүүнү, күһүн Курбуһахха тэрээһиннээхтик ыытарга былаан ылыннылар уонна да араас боппуруостар тула киэҥник кэпсэттилэр.
Түмүккэ Василий Петрович Курбуһах нэһилиэгин олохтоохторун кытары биир өйгө-санааҕа киирэн, улуус сайдарын туһугар түмсүүлээхтик үлэлииргэ ыҥырда.
Улуус дьаһалтатын пресс-сулууспата