“Тойон Мүрү” култуура дыбарыаһыгар улууспут үбүн-харчытын, сыллааҕы бюджетын, отчуотунаһын толорор улуус күннээҕи итиэннэ бүттүүн инники дьылҕатын быһаарар салаа 95 сыллаах үбүлүөйүн көрсө тахсыбыт “95 лет финансовому органу Усть-Алданского улуса” диэн саҥа кинигэ биһирэмэ үбүлүөйү бэлиэтиир тэрээһини кытта бүгүн тэҥинэн ыытылынна. Үбүлүөйдээх кинигэ редакторынан С.С. Васильев- Борогонскай аатынан кииннэммит библиотека справочнай-библиографическай отделын библиограба Марианна Борисова үлэлээн, сиппит-хоппут кинигэ буолан таҕыста. Бу күнү талааннаах үлэһиттэр оҥоһуктарын быыстапката сэҥээртэ.
Үөрүүлээх чааска улуус баһылыга Василий Алексеев үп-харчы салаатын оруолун бэлиэтээтэ, араас сылларга үлэлээн ааспыт үлэһиттэргэ дириҥ махталын биллэрдэ. Улуус инники сайдыытын түстүүр салаа өссө да таһаарыылаахтык үлэлииригэр баҕа санаатын тиэрдэн туран, салайааччы Туяра Кузьминаҕа 100 тыһыынча солкуобайдаах сертификаты туттарда. Бастыҥ үлэһиттэргэ Ил Түмэн Бочуотунай грамотатынан Мария Алексееваны, Анастасия Львованы, СӨ Үбүн министиэристибэтин Бочуотунай грамотатынан Юлия Ушницкаяны, Маргарита Алексееваны, “СӨ муниципальнай сулууспатын бэтэрээнэ” бэлиэнэн Туяра Кузьминаны, Люция Аммосованы, Александра Протопопованы, Маргарита Петрованы, “Үлэҕэ килбиэнин иһин” мэтээлинэн бэтэрээн үлэһит Галина Чаптыкованы, Уус Алдан улууһун дьаһалтатын Бочуотунай грамотатынан Иннокентий Слепцову, Феврония Свинобоеваны, Анастасия Жиркованы, Розалия Софронованы, Сергиян Борисовы, Людмила Босикованы наҕараадалаата. Улуус депутаттарын Сэбиэтин бэрэссэдээтэлэ Иннокентий Аммосов улахан суолталаах бэлиэ күнүнэн эҕэрдэлээн туран, сөптөөх үбүлээһин тэриллиититтэн, аттарылыытыттан, хонтуруолланыытыттан улуус сайдыыта бүттүүн тутулуктааҕын ыйан туран, бастыҥ үлэһиттэргэ наҕараадалары туттарда. Үп-харчы салаатын анал бэлиэтинэн Евдокия Жиркова, Раиса Гоголева, Люция Соловьева, Снежана Гоголева наҕараадаланнылар.
Мустубут ыалдьыттары бу салааҕа бэйэлэрин үрдүк таһымнаах үлэлэрин көрдөрөн, онтон үүнэн-сайдан үрдүк дуоһунаска үлэлии сылдьар СӨ Экономикаҕа миниистирэ Петр Попов, Уһук Илин Федеральнай уокурукка Саха Өрөспүүбүлүкэтин бэрэстэбиитэлэ Петр Бурнашев, Өймөкөөн улууһун баһылыгын бастакы солбуйааччы Алексей Федотов, о.д.а. эҕэрдэлээтилэр. Үлэлээбит оччотооҕу кэмнэрин, чугастык алтыспыт кэллиэгэлэрин туһунан истиҥ-иһирэх ахтыыны Дьокуускайтан салаа бэтэрээнэ Маргарита Сергеева оҥордо. Итиэннэ дириҥ ис хоһоонноох, элбэх хаартыскалардаах ахтыылартан турар “95 лет финансовому органу Усть-Алданского улуса” диэн кинигэ бэчээттэммитин бэлиэтээтэ.
Салгыы бэйэлэрин эҕэрдэлэрин улуус нэһилиэктэрин баһылыктара, тэрилтэлэр салайааччылара тиэртилэр, инники үлэлэригэр үрдүк ситиһиини, доруобуйаны баҕардылар.
Светлана Сивцева