Российскай Федерация уонна Саха Өрөспүүбүлүкэтин агропромышленнай комплексын бочуоттаах үлэһитэ, РФ «Партийнай килбиэн иһин» орден кавалера, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Саха сирин тыатын хаһаайыстыбатын уонна уутун хаһаайыстыбатын туйгуна, Мүрү, I Өспөх, Баатаҕай нэһилиэктэрин, Уус Алдан улууһун улууһун бочуоттаах олохтооҕо, «Саха сирин идэлээх сойууһун хамсааһынын сайдыытыгар, Саха Өрөспүүбүлүкэтигэр бүттүүн норуот үтүө дьыала хамсааһынын олоххо киллэриигэ, Саха Өрөспүүбүлүкэтигэр физическэй култуура уонна спорт сайдыытыгар, Уус Алдан улууһун үөрэҕириитин, култууратын сайдыытыгар киллэрбит кылаатын иһин», о.д.а. араас наҕараадалар, мэтээллэр хаһаайыннара, СӨ буулдьанан ытыы спордун I категориялаах судьуйата, үлэ, спорт, мелиорация бэтэрээнэ, улуус Мунньаҕын хас да төгүллээх дьокутаата, өр сылларга тыа хаһаайыстыбатын министерствотын мелиорацияҕа уонна тыа сирин уунан хааччыйар управлениетын Мүрүтээҕи филиалын тэрийэн, салайан үлэлэппит, улууспут, өрөспүүбүлүкэбит биир улахан баай уопуттаах мелиоратора, дьон-норуот туһугар үлэлээбит, дьоҥҥо-сэргэҕэ дириҥник убаастанар салайааччы, улахан дьиэ кэргэн аҕа баһылыга Николай Николаевич Оллонов оскуоланы оскуола, бөһүөлэги нэһилиэк оҥорбут сыралаах үлэтин сыаналаан, 2024 сыл кулун тутар 20 күнүгэр улуус дьокутааттарын уочараты таһынан IV-с сессияларыгар I Өспөх нэһилиэгин Уһун Күөл орто оскуолатыгар Николай Николаевич Оллонов үрдүк аатын үйэтитэн, кини аатын иҥэрэргэ быһаарыныы ылыммыттара.
Күн бүгүн, оскуола докумуона барыта оҥоһуллан, Уһун Күөл бөһүөлэгэр, Уһун Күөл орто оскуолатыгар Николай Николаевич Оллонов аатын иҥэриллиитэ, кини чиэһигэр стендэ уонна бюст арыллыыта балаҕан ыйын 6 күнүгэр үөрүүлээх быһыыга-майгыга ыытылынна.
Николай Николаевиһы ахтан-санаан, улууспут салайааччылара, дьокутааттара, нэһилиэктэр баһылыктара, үөрэх, култуура, мелиорация үлэһиттэрэ, КПРФ партия чилиэннэрэ, бииргэ алтыспыт үөлээннээхтэрэ, Омскай куоракка институкка тэҥҥэ устудьуоннаабыт доҕотторо, Дүпсүн оскуолатыгар бииргэ үөрэммит оҕолоро, учуутала, Н.Н. Оллонов аатынан Уһун Күөл орто оскуолатын үөрэнээчилэрэ, оскуола кэлэктиибэ, Уһун Күөл тэрилтэлэрин салайааччылара, нэһилиэк олохтоохторо, чугас аймахтара, бииргэ төрөөбүттэрэ, дьиэ кэргэнэ сүүһүнэн киһи тоҕуоруһа муһунна.
Тэрээһин арыллыытыгар, нэһилиэк түмсүүтүн кыттыылаахтара ыалдьыттары арыылаах алаадьынан, толору кымыстаах чороонунан айах туттулар, буруолатан ыраастаатылар.
Стендэ уонна бюст арыллыытын оскуола дириэктэрэ Наталья Гаврильевна Турантаева иилээн-саҕалаан ыытта. Уус Алдан улууһун дьаһалтатын баһылыгын социальнай боппуруостарга солбуйааччы Анатолий Дмитриевич Сторожев, үөрэх салалтатын начаалынньыга Степан Моисеевич Литвинцев уонна Николай Николаевич Оллонов кэргэнэ, СӨ социальнай харалтаҕа туйгуна, СӨ «Гражданскай килбиэн» анал аат, “Уус Алдан улууһун уонна Мүрү нэһилиэгин социальнай-экономическэй сайдыытыгар киллэрбит кылаат иһин» бэлиэлэр хаһаайкалара, Мүрү нэһилиэгин бочуоттаах олохтооҕо, үлэ бэтэрээнэ Анна Ивановна Оллонова кыһыл лиэнтэни кырыйдылар. Оскуола оҕолоро Николай Николаевичка анаан хоһоон-монтаж аахтылар, стендэ уонна бюст сабыытын арыйдылар.
Бу күн, Николай Николаевич олоҕун, төрөппүттэрин сырдатар “Үтүө дьон аата үйэлэри уҥуордуо” диэн ааттаах улахан быыстапка турда. Николай Николаевич уруһуйдаабыт уруһуйдара, наҕараадалара, олоҕун суолун көрдөрөр араас кинигэлэрэ, кийиитинээн тикпит киһи уһуннаах куукулалара туруоруллубуттара дьон биһирэбилин ылла.
Тэрээһини ырыа учуутала Андрей Никитин, Николай Николаевич аймахтара Василий Местников, Николай Бурнашев, сиэнэ Долун Оллонов ылбаҕай ырыаларынан, сиэнэ Алгыстана Оллонова хоһоонунан, Намтан төрүттээх, кэргэнин быраата Владимир Осипов оһуохайынан киэргэттилэр, ситэрэн-хоторон биэрдилэр.
Бу күн кэлбит ыалдьыттар Николай Николаевич эргиччи дэгиттэр талааннааҕын, үнкүүһүтүн, худуоһунньугун, байанайдаах булчутун, сатабыллаах салайааччытын, бэриниилээх хомуньууһун, дьоҥҥо үтүө сыһыанын, мындыр өйүн, сымнаҕас майгытын сырдаттылар. Николай Николаевич үлэлиир сылларыгар улууһун дьонун-сэргэтин туһугар араас элбэх үлэни ыыппытын, “Лена-Мүрү” иһэр уу ситимин баараҕай тутуутун салайан үлэҕэ киллэрбитин, I Өспөх туспа нэһилиэк, Уһун Күөл оскуолатын 11 кылаастаах орто оскуола буолуутун ситиспитин, Уһун Күөлгэ, Суоттуга Кыайыы болуоссаттарын туппутун, Уус Алдан улууһугар ытыы спордун сайыннаран ытыы федерациятын тэрийбитин, үйэлээх үлэлэри ыыппытын бэлиэтээн эттилэр. Кини аата үйэтитиллэн, Уһун Күөл орто оскуолатыгар Н.Н. Оллонов аата иэҥриллибитин астына бэлиэтээтилэр.
Түгэнинэн туһанан, оскуола коллективын аатыттан, биһиги оскуолабытыгар стендэ, баннер, бюст, торт оҥотторон бэлэх ууммуккутугар кэргэнигэр Анна Ивановнаҕа, кийиитигэр Майя Николаевнаҕа, оҕолоругар, бииргэ төрөөбүттэригэр уонна бары чугас аймахтарыгар тэрээһин чааһыгар көмөлөспүккүтүгэр махтанабыт. Чуолаан, Николай Николаевич орто уолугар скульптор Геннадий Николаевичка ис сүрэхпититтэн махтанабыт. Геннадий Николаевич улууска, өрөспүүбүлүкэҕэ биллэр талааннаах скульптор буолан эрэринэн киэн туттабыт. Инникитин даҕаны, Оллоновтар дьиэ кэргэни кытары ситимнээхтик үлэлиэхпит диэн эрэнэбит, ыҥырабыт.
Оскуола кэлэктиибэ