Бу күннэргэ норуот билгэһитэ Тускулга элбэх ыйытыы киирэр. Дьону быйылгы кыһын төһө тымныы дуу, ичигэс дуу буолара долгутар. Онуоха кини “Уоскуйуҥ. Быйыл сылаас, сымнаҕас кыһын иһэр, доҕоттор” диир. Ону кини улахан суолталаах айылҕа хамсааһыннарыгар олоҕуран этэрин билинэр.
“2025 сыл сэтинньи 7 күнүгэр саха омук билгэлиир сулуһа — Үргэл — Ыйы кытта адьас чугаһынан алтыспыта. Өбүгэлэрбит итинник аасыһыыны “сылаас кыһын кэлэригэр” дииллэрэ. Ааспыт да сылларга кэтээн көрдөххө, Үргэл алтыһыыта адьас сыыстарбат этэ.
Күн муҥутуур үрдүк 25-с циклын түмүктээтэ. Ол эбэтэр 11 сыллаах цикл (2020 сылтан саҕаланан баран, 2030 сылга диэри салҕанар) ортотун аастыбыт. Ол аата күҥҥэ эстии 2026 сылтан аччыыр. Кураан сайын түмүктэнэр. Мантан ыла 2030 сылга диэри сөбүгэр сөрүүн, орто уулаах сайын үүнэр.
Ыаллыы сытар Камчаткаҕа 500 сыл устата сөҥөн сыппыт аҕыс вулкан уһуктан, биир тэҥҥэ эстэн, 7 км үрдүккэ күлүнэн ыһыахтаан, оргуйбут таас олгуолар өрүстүү уста сыталлара дьулаан көстүү этэ. Ол тыына биһиэхэ эмиэ биллэр. Онон ахсынньы уонна тохсунньу ыйдар былырыыҥҥы курдук сөбүгэр ичигэс буолуохтара. Саҥа дьыл иннигэр-кэннигэр кыратык 40-45 кыраадыс тымныйан ылыаҕа. Үгүс улуустарга -40, -30 кыраадыс тымныйыаҕа. Ити сахаларга «ичигэс» дэнэр.
Өрөспүүбүлүкэ саамай тымныы улуустарыгар Өймөкөөҥҥө уонна Дьааҥыга эмиэ улаханнык тымныйыа суоҕа. Өймөкөөн диэки улахан тымныы кылгастык түһэн ааһыаҕа. Дьааҥыга тымныы -50 кыраадыска тиийэн ылыаҕа. Онон ичигэс, сымнаҕас кыһын иһэр, доҕоттор”, — диэн норуот билгэһитэ Тускул дьону-сэргэни уоскутар.