Бу нэдиэлэҕэ от ыйын 8-10 күннэригэр Саха сирин ИДьМ идэлээх бэлэмниир киинин баазатыгар «Таежный герой» диэн өрөспүүбүлүкэтээҕи байыаннай-спортивнай оонньуу ыытылынна. Оонньуу быйыл 14-с төгүлүн ыытылынна, уопсайа 220 оҕо сэттэ улуустан, Дьокуускайтан, Жатайтан, уопсайа 22 хамаанда кытынна.
Биһиги улууспутуттан Мүрү 1-ы №-дээх орто оскуолатыттан хамандыырд Женя Бочкарев (8 «в») хамаандаҕа: Максим Потапов (8 «в»), Мирослав Сидоров (9 «б»), Саша Софронов (9 «б»), Алеша Торговкин (8 «а»), Айысхаан Рожин (9 «а»), Жанна Иванова (8 «г»), Сайыына Соловьева (8 «г»), Карина Протопопова (9 «в»), Мүрүтээҕи уолаттар гимназияларыттан Аслан Иванов (8 кыл.) уопсайа 10 оҕо сүүмэрдэммитэ. Хамаанданы РФ Ис Дьыалаҕа министерствотын СӨ Уус Алданнааҕы салаатын сокуоннай саастарын туола илик оҕолор дьыалаларын көрөр подразделение инспектора, полиция лейтенана Наталья Николаева уонна полиция учаастактааҕы боломуочунайа, полиция сержана Аина Федорова салайан илдьэ сырыттылар.
Бастакы күҥҥэ ИДьМ Росгвардия сулууспата тэрийбит байыаннай эстафетаны кытта 10 станциялаах оонньуу, визитка күрэһэ ыытыллыбыта. Станциялар ааттара: автоматы ыһыы, хомуйуу, «РХБЗ» бириэмэҕэ кэтии,бастакы суһал көмөнү оҥоруу», «интуиция», «квадрат суммата», «Россия геройдара», «Камень-ножницы-бумага», үҥкүү курэһэ, беспилотнигы көтүтүү, «Таежный кадр» диэн хаартыска күрэһэ, ытыы күрэһэ, «Экстремизм» уопсай өйдөбүлэ, эппиэтинэһэ. Олус хатыйсыылаах, сүүрүүлээх-көтүүлээх күрэх кэннэ байыаннай эстафетаҕа Уус Алдан улууһун «Мүрү» хамаандата бастакы миэстэни ылары ситистэ. Визитка күрэһэр Аслан Иванов гитаранан тыыннаах музыканан оонньоон, оҕолорбут олус үчүгэйдик ыллаан, элбэх киһи биһирэбилин ылыахтарын ылбыттара, сүрэхтэрин долгуппуттара.
Иккис күҥҥэ оҕолорго анаан элбэх сэргэхситэр тэрээһин ыытыллыбыта. Ол курдук Кыайыы болуоссатыгар эскурсия, квест-ооньуу, ГИБДД, ЫБМ подразделениелар спецтехникаларын көрүү, викторина, Лазертаг күрэс, бассейн, киинэ, мотоцикллар бөлөхтөрүн уонна кавалерийскай взвод, кинологическай сулууспа үлэлэрин көрдүбүт.
ИДьМ үөрэнэр киинин полигонугар оҕолорго “палаакканан городок” тэрийдилэр, “полевой куукунаҕа” күҥҥэ биэстэ олус минньигэстик аһаттылар.
Икки күннээх тыҥааһыннаах күрэс түмүгүнэн:
Гран-при — Уус Алдан
1 миэстэ — Горнай
2 миэстэ — Амма
3 миэстэ — Чурапчы, Мэнэ Хаҥалас улуустара таҕыстылар.
Күрэс үрдүк таһымнаахтык ааста. ИДьМ үлэһиттэрэ санааларын ууран, олус кыһаллан-мүһэллэн туран ыыттылар.
Кыттыбыт оҕолорбутун кыайыыларынан итиитик-истиҥник эҕэрдэлиибит, улуустарын аатын үрдүктүк ааттаппыттарыгар махтанабыт.
Наталья Николаева, ИДЬМ улуустааҕы салаатын ПДН инспектора