Бүгүн Түүлээх орто оскуолатын 10-с кылааһын үөрэнээччилэрэ Хабаровскай куоракка «Всероссийские соревнования среди школьных спасательных отрядов» күрэс полуфиналыгар кытта айаннаатылар. Кинилэри улуус дьаһалтатын баһылыга Василий Алексеев көрсөн кынаттыыр алгыс тылларын этэн атаарда. Василий Петрович: «Кылаабынайа бэйэҕитин итэҕэйин, бэйэҕэтигэр итэҕэйдэххитинэ кыайыы-хотуу өрөгөйүн билиэххитин сөп. Оттон хотторуу хомолтотун биллэххитинэ санааҕытын түһэрээйэҕит, маннык улахан таһымнаах күрэскэ кыттыы эһиэхэ элбэҕи биэриэҕэ» — диэн ис хоһоонноох эттэ.
Оҕолор ортолоругар Леонид Асекритов, Ариан Бережнев, Милена Кузьмина, Сандаара Самсонова, Эрхан Неустроев бааллар. Эрхан бу күрэскэ кытта барар буолбуттарын туһунан маннык кэпсээтэ:
— Биһиги оскуолабыт үс сэрии кыттыылааҕа, алта бойобуой орден кавалера, гвардия майорун Дмитрий Данилович Оллонов аатын сүгэр. Ол иһин геройга тэҥнээх киһибит олоҕун-дьаһаҕын үөрэтэбит. Онон сирдэтэн араас таһымнаах байыаннай патриотическай оонньуулар буолаллар. Биһиги кыра эрдэхпититтэн араас курэхтэһиилэргэ кыттыыны ылабыт, патриот буола үөрэнэбит. Бу сайын “Оҕо саас сирдьиттэрэ” хамсааһын ыыппыт бүтүн Россиятааҕы быыһыыр этэрээттэрин күрэһэр кыттан, уокуругтааҕы түһүмэххэ кыттар чиэскэ тигистибит. Күрэспит Хабаровскай куоракка бу ый 29-30 күннэригэр уонна алтынньы ый маҥнайгы күннэригэр 3 күн устата ыытыллар. Кыайыылаахтар салгыы Бүтүн Арассыыйатааҕы күрэскэ бараллар. Салайааччыбыт иитэр үлэҕэ дириэктэр субэһитэ Ольга Олеговна.
Аҕыс түһүмэхтэн турар сүрдээх уустук күрэс күүтэр: тургутук, баһаарынай эстафета, баһаары умулларыы, бастакы көмө, ууга түспүт киһини быыһааһын, альпинисткай узеллары баайыы, бириэмэҕэ баһаарынай таҥаһын кэтии, көрдүүр-быыһыыр үлэлэри сөпкө оҥоруу. Дьиэбитигэр Түүлээххэ бэлэмнэнэн баран, биир нэдиэлэ манна Бороҕоҥҥо дьарыктанныбыт. Улууспут манна сыһыаннаах тэрилтэлэрэ бары көмө буолаллар. Ол курдук, улуустааҕы баһаарынай чааһа, ГИМС-тар, суһал көмө үлэһиттэрэ, узелларга, ориентированиеҕа Мүрү 1-гы №-дээх орто оскуолатын учуутала Афанасий Гоголев, медик Анастасия Жиркова үгүс билиини, сүбэни биэрдилэр, кинилэргэ махталбытын тиэрдиэ этибит. Улууспут, республикабыт аатын үрдүктүк тутан, туох баар кыһамньыбытын ууран туран күрэхтэһиэхпит диэн айаҥҥа өрө көтөҕүллэн туруннубут.
Оҕолору “Оҕо саас сирдьиттэрэ” хамсааһын улуустааҕы куратора Мария Винокурова уонна оҕолор салайааччылара Ольга Константинова салайан илдьэ сылдьыахтара.
Мария АРГУНОВА