«Ама илгэлээх Ийэ тылбыт иинэр-хатар, төрөөбүт тылбыт үтүрүллэр, сахабыт тыла сарбыллар кэмэ кэлиэ дуо?» диэн ыйытыы үгүс киһини үүйэ-хаайа тутар олоҕор тиийэн кэлбит эбиппит. Чахчы даҕаны төрөөбүт тылбытыгар кыһалҕа үөскээн, ааспыт сылга ол тула икки улахан сийиэс буолбута даҕаны элбэҕи этэн эрдэҕэ. Онон билигин быыһык кэм дэнэр кэрдиискэ сахалыы тыллаахтар бэйэбит хамсаннахпытына табылларын бириэмэ ирдиирэ билиннэ. Хата ол туһунан толкуйдуур дьонноох эбиппит диэн махтаныаҕы баҕарыллар.
Улуус кииниттэн аныгылыы десант диэн тэриллэн, олунньу 10 күнүгэр Бэрт Ууһун нэһилиэгин Сыырдаах бөһүөлэгэр «Ийэ тыл илгэтэ» диэн төрөөбүт тылбытын харыстыыр, сайыннарар туһунан толкуйу түмэр, кэскиллээҕи торумнуур бастакы көрсүһүүнү тэрийдэ.
Десант кыттыылаахтара: үөрэх салалтатын методическай салаатын салайааччыта Клара Троева, улуустааҕы кииннэммит библиотека салайааччыта Лена Павлова, В.В. Алексеев аатынан Мүрүтээҕи уолаттар гимназияларын учуутала, филология билимин кандидата Наталия Бурцева, киин бибилэтиэкэ куйаар ситиминэн үлэни тэрийэр салаатын салайааччы Роза Колодезникова, киин бибилэтиэкэ кыраайы үөрэтэр салаатын салайааччы Ольга Павлова,
улуустааҕы оҕо бибилэтиэкэтин, Оҕо ийэ тылынан ааҕыытын көҕүлүүр киин үлэһитэ Надежда Гоголева, «Кэскил түһэ» ийэ тыл улуустааҕы түмсүүтүн салайааччыта Светлана Бурцева, Г.В. Егоров аатынан Мүрү 1№-дээх орто оскуолатын 10-с кылааһын үөрэнээччитэ Коля Оллонов.
Олохтоох нэһилиэнньэ өттүттэн «Чуораанчык» уһуйаан, оскуола төрөппүттэрэ, нэһилиэккэ баар тэрилтэлэр үлэһиттэрэ, «Эйэҕэс эбэлэр» түмсүү кыттыылаахтара, олохтоох дьаһалта, депутаттар бааллар. Сахалыы тыыннаах оскуолаҕа директор Марианна Петрова, нэһилиэк баһылыга Илья Ильин үөрэ-көтө көрүстүлэр, сахалыы таҥныбыт далбар хотуттар алаадьынан, кымыһынан айах туттулар, эйэҕэстик сэһэргэстилэр. Көрсүһүүнү бу кэскиллээх хамсааһыны көҕүлээччи, десант салайааччыта Клара Троева иилээн-саҕалаан ыытта. Кини төрөөбүт тылбыт харыстабылга наадыйар диэн бэлиэтээн, ситэрэн ситимнээн, биир-биир тыл биэрэн истэ. Киэҥ ис хоһоонноох көрсүһүүгэ Өрөспүүбүлүкэҕэ ыытыллыбыт саха тылын, литэрэтиирэтин, култууратын учууталларын 3-с сийиэһин, бибилэтиэкэрдэр маҥнайгы сийиэстэрин туһунан иһитиннэриилэр, суруйааччы туһунан бэсиэдэ, айымньынан тургутук, саха тылын дьылҕатын туһунан санаа атастаһыыта, «Күн» оҕолор түмсүүлэрин туһунан билсии, сахалыы ааҕыы туруга хайдаҕын дьүүллэһии, удьуору үөрэтии, тылбыт тула үөскээбит кыһалҕа туһунан кэпсэтиилэр, сонуннар, ырытыылар оҥоһулуннулар. Олохтоохтор хардары бэйэлэрин олохторугар сыһыары тутан санааларын үллэһиннилэр, кыра саастаах оҕолор нууччалыы саҥарар чахчылара баарын бигэргэттилэр.
Киэһэ хойукка диэри буолбут уратылаах көрсүһүү маннык кэпсэтиилэр олус туһалаахтарын, тылбытын харыстааһыҥҥа, сайыннарыыга чопчу ыйыылар-кэрдиилэр, тэтимнээх хамсаныылар, туһааннаах үлэлэр наадаларын арылхайдык көрдөрдө. Десант үлэтэ салҕаныахтын, бар дьоҥҥо көмө буолуохтун!
Светлана Бурцева, уопсас. кэрэсп.