Бүгүн Сыырдаах бөһүөлэгэр Геройдар сквердэригэр аата Саха сирин историятыгар көмүс буукубанан суруллубут Уус Алдан оройуонун Бэрт Ууһун нэһилиэгин «Кыччама» холкуоһун чулуу ыанньыксыта, ССРС Верховнай Сэбиэтигэр саха дьахталларыттан бастакы депутат, «Бочуот Знага » орден кавалера Ирина Дмитриевна Олесова 110 сылын бэлиэтиир тэрээһин ыытылынна.
Бу бэлиэ күн үөрүүлээх чааһыгар Кондрат Герасимов «Орденнаах Өрүүчэ» хоһоону доргуччу аахта, Пелагея Парникова И.Д. Олесова олоҕун, үлэтин билиһиннэрдэ. Нэһилиэк баһылыга Илья Ильин кэнчээри ыччаппытын, нэһилиэк олохтоохторун бу бэлиэ күнүнэн эҕэрдэлээтэ.
Тэрээһин түмүгэр И.Д. Олесова пааматынньыгар сибэкки дьөрбөтүн уурдубут, бука бары хаартыскаҕа түстүбүт.
Ахсынньы тымныытын аахсыбакка кэлэн кыттыбыт И.С. Портнягин аатынан Сыырдаах орто оскуолатын улахан кылаастарын оҕолоругар, кылаас салайааччыларыгар, оскуола салалтатыгар уонна нэһилиэк олохтоохторугар махтал тылбытын тиэрдэбит.
А.П. Иванов аат. норуот айымньытын киинин иһитиннэриитэ