Кулун тутар 25 күнүгэр «Өркөн» оҕону эбии үөрэхтээһин киинин (директор Д.Н. Готовцев) иһинэн үлэлиир медиатехнологияларынан, IT, хаартысканы уонна видеоны оҥоруунунан, блогинынан, робототехниканан уонна айар үлэнэн дьарыктанар «МедиаЛаб» киин (сал. Е.М. Окоемова) эрдэттэн билсэн, сүбэлэһэн, «История туоһулара» медиаүөрэхтээһин экспедициянан И.С. Портнягин аатынан Сыырдаах орто оскуолатыгар ыалдьыттаатылар.
Сарсыардаттан саҕалаан 5-8 кылаас үөрэнээччилэригэр анаан кылаас чааһын, ону тэҥэ маастар-кылаас ыыттылар. Оҕолорбут олус интэриэһиргээн иһиттилэр, элбэҕи биллилэр-көрдүлэр, бэртээхэй көрсүһүү буолла. Тэрээһин учууталлартан оскуола юнкордарыгар тиийэ истээччини хапта.
Билиҥҥи олох ирдэбилинэн хас биирдии улахан тэрилтэ үлэтин сырдатар куйаар ситимигэр госпабликтаах, ол үлэтэ хайдах харгыһа суох барыахтааҕын, ымпыгын-чымпыгын ыйан-кэрдэн, көрдөрөн биэрдилэр. Ааҕааччы интэриэһин тардыы, хаартыскаҕа түһэрии, видеоҕа устуу, ыстатыйалары хайдах былааннаах суруйуу туһунан элбэх албастар баалларын, үөрүйэхтэрин билиһиннэрдилэр.
Эбиэт кэннэ Аҕа дойду Улуу сэриитин кыттыылаахтарын, тыыл бэтэрээннэрин оҕолорун, сэрии тулаайахтарын, араас эйгэ туруу үлэһиттэрин ахтыыларын устан, бэйэтин тула түмэн, кырдьыктаах историяны харыстааһын, историяны үөрэтиини көҕүлээһин уонна ахтыылары видеоархив оҥорон, үйэтитэн, улууспут сайдыытыгар элбэх кылааты киллэрии сыаллаах ыытылынна.
Түгэнинэн туһанан, бу «История туоһулара» медиаүөрэхтээһин экспедициятын тэрийээччилэригэр, кыттыылаахтарыгар дириҥ ис хоһоонноох үйэлээх үлэҕит иһин оскуола салалтатын аатыттан махталбытын тиэрдэбит.
Ньургуяна Хорунова, иитэр үлэҕэ дириэктэри солбуйааччы