Кэрэ-мааны айылҕалаах, лэһигирэс эмис соболоох, сыллата туруйа үөрдээн тохтоон ааһар Баатаҕай нэһилиэгэ элбэх талааннаах олоҥхоһут, сэһэнньит уутуйан төрөөбүт- үөскээбит сирдэрэ- уоттара буолар. Баатаҕай орто оскуолатын иһинэн тэриллибит Саха сиригэр физкультурнай хамсааһыны төрүттээбит Николай Тарскай аатынан түмэл өрөспүүбүлүкэҕэ биллэр.
Оттон нэһилиэк биир ытыктанар ыала, бочуоттаах олохтоохторо, элбэх оҕолоох, сиэннээх, хос сиэннээх Анна, Алексей Бурнашевтар урукку сылларга элбэх сүөһүнү-аһы тутан олорбут хотоннорун дьиэ кэргэн сахалыы үгэстэрин көрдөрөр түмэллэрин арыйыахтарыттан ыла улуус олохтоохторо, ону тэҥэ өрөспүүбүлүкэ араас улуустарыттан, Дьокуускайтан ыалдьыттар таарыйан, көрөн-истэн ааһар үгэстэрэ олохтонон эрэр.
Ол курдук быйыл сайын ыраах сытар Сунтаар улууһуттан үөрэх управлениетын начальнига С.Д. Омукова уонна музей сотруднига Н.А.Омуков сылдьан ыалдьыттаатылар. Ыалдьыттар дьиэ кэргэн түмэлэ элбэх үлэттэн, дириҥ толкуйтан оҥоһуллубут диэн үрдүктүк сыаналаатылар. Махталларын, билиниилэрин бэлиэтин өрөспүүбүлүкэ аатырар оһуохайдьыта Сергей Зверев үбүлүөйдээх бэлиэтин туттардылар.
Итиэннэ маннык араас ис хоһооноох төрүт үгэстэри тилиннэрэр, саха омук историятын тилиннэрэр араас хабааннаах музейдар, хостор тэнийэн, чэчирээн иһэллэригэр баҕа санааларын тиэртилэр.
Светлана Сивцева