Бүгүҥҥэттэн улуус киинигэр үөрэх салаатын үлэһиттэрин икки күннээх балаҕан ыйдааҕы сүбэ мунньахтара саҕаланна. Мунньах хас да анал былаһааккаларынан ыытыллар.
Бастакы былаһааккаҕа оскуола дириэктэрдэрэ уонна кинилэри үөрэх чааһыгар солбуйааччылар сүбэ мунньахтара буолла. Онно доруобуйаларынан хаарчахтаах (инбэлиит) оҕолору оскуолаҕа үөрэтиигэ анал усулуобуйаны тэрийии туһунан кэпсэттилэр, тохсус уонна уон биирис кылаастар кэннилэриттэн судаарыстыбаннай эксээмэннэри туттарыы түмүктэрэ дьүүллэһилиннилэр, ону тэҥэ идэҕэ туһаайан үөрэтии. Онно бэлэмнээһин туһунан дьүүллэстилэр. Ону тэҥэ МАХ саҥа россиятааҕы мессенджергэ “Госуслуги”, “Моя школа” мобильнай сыһыарыылары көһөрүүнү билистилэр.
Иккис былаһаакка тэрээһинэ Мүрү 2-с №-дээх орто оскуолатыгар ыытылла турар. Манна учууталларга аналлаах семинар буола турар. Ол курдук эбиэккэ диэри учууталлар бэйэлэрин тустаах предметтэринэн уруоктары ыытан көрдөрөллөр. Онтон киэһэ семинар дьыалабыай чааһыгар саҥа үөрэх дьылын былааннарын дьүүллэһиэхтэрэ.
Үһүс былаһааккаҕа Мүрү 2-с №-дээх оскуолатын актовай саалатыгар оҕону үлэнэн иитии, сайыҥҥы сынньалаҥы тэрийии, оҕолор уопсастыбаннай түмсүүлэрин туһунан кэпсэтиэхтэрэ.
Афанасий Сектяев