Бүгүн Россия Үлэҕэ Дьоруойа Михаил Готовцев үбүлүөйдээх 80 сааһын бэлиэтиир тэрээһиннэри ыытыыга улуус дьаһалтатын киэҥ ыҥырыылаах көһө сылдьар мунньаҕа Байаҕантай нэһилиэгэр буолла.
Улуус дьаһалтатыттан улуус баһылыгын бастакы солбуйааччы Семен Бурнашев салайааччылаах тэрийэр хамыыһыйа уонна Байаҕантай нэһилиэгин общественноһа кыттыылаах мунньах тэрилиннэ.
Мунньахха өрөспүүбүлүкэ уонна улуус таһымыгар ыытыллыахтаах үбүлүөй сүрүн тэрээһиннэрин туһунан иһитиннэриини Семен Бурнашев оҥордо. Улуус баһылыгын дьаһалыгар олоҕуран Россия Үлэҕэ Дьоруойа Михаил Готовцев 80 сааһын бэлиэтиир үбүлүөйдээх тэрээһиннэри үрдүк таһымҥа тэрийэн ыытыыга анал хамыыһыйа тэриллэн үлэтин саҕалаабыта. Былаан быһыытынан үбүлүөйдээх сыл чэрчитинэн «Убаһалаах» базаҕа 100 төбөҕө анаан саҥа хотону тутуу, Михаил Николаевич аатын сүгэр оскуола базатыгар оҕолорго научнай-практическай конференциялар, тыа хаһаайыстыбатын үлэһиттэригэр өрөспүүбүлүкэтээҕи «Бастыҥ осеменатор», улуустааҕы «Бастыҥ ыанньыксыт» күрэхтэри тэрийэн ыытыы, Михаил Николаевич олоҕун, үлэтин киэҥник сырдатар кинигэ тахсыыта, документальнай киинэ уһуллуута, Байаҕантай нэһилиэгэр үбүлүөйдээх ыһыаҕы үрдүк тэрээһиннээхтик ыытыы, онтон да атын кэскиллээх бырайыактар олоххо киирэллэрэ былааннанар.
Байаҕантай нэһилиэгэр үбүлүөйдээх сылга ыытыллыахтаах үлэлэр тустарынан нэһилиэк баһылыга Савва Егоров иһитиннэрдэ. Ол курдук нэһилиэк баһылыгын дьаһалыгар олоҕуран олунньу 6 күнүгэр Россияҕа Сомоҕолоһуу, өрөспүүбүлүкэҕэ Култуура, улууска Түмсүү уонна бииргэ үлэлээһин, нэһилиэккэ Михаил Готовцев үбүлүөйдээх сылларын арыйыы үөрүүлээх тэрээһинэ буолуоҕа. Быйылгы үбүлүөйдээх сылга саҥа сүүрээн быһыытынан култуура уонна спорт тэрээһиннэрэ Михаил Николаевич сөбүлүүр көрүҥнэригэр олоҕуран ыытыллаллара былааннанарын туһунан иһитиннэрдэ.
Убаһалаахха Михаил Николаевич олорор, үлэлиир усулуобуйатын хааччыйыыга, чөлүгэр түһэриигэ ыытылла турар уонна ыытыллыахтаах үлэлэр тустарынан тыа хаһаайыстыбатын улуустааҕы управлениетын начальнига Артем Сивцев билиһиннэрдэ. Ааспыт сылга уокка былдьаммыт гарааһы чөлүгэр түһэриигэ улуус бары нэһилиэктэрин баһылыктара туора турбакка, кыттыһан матырыйаалын ылан биэрэн көмөлөһөр биир санааны ылыммыттарыгар улуус дьаһалтатын аатыттан махталларын тиэртилэр.
Михаил Готовцев аатын сүгэр Танда агро хайысхалаах орто оскуолатыгар үбүлүөйгэ анаан элбэх тэрээһин былааннанар, бу туһунан оскуола дириэктэрэ Константин Готовцев сырдатта. Ол курдук оҕону тыа хаһаайыстыбатын үлэтигэр сыһыаран иитии сыаллаах 6-с төгүлүн ыытыллар «Агронтика» күрэх быйыл Михиал Николаевич үбүлүөйүгэр ананан ыытыллыаҕа. Маны таһынан Михаил Николаевич аатынан 7-с төгүлүн ыытыллар «Сельская жизнь» научнай-практическай конференция быйылгыттан өрөспүүбүлүкэ таһымыгар ыытыллара былааннанар, «Мы гордимся именем Героя Труда» үөрэтэр-патриотическай улуустааҕы десант буолуохтааҕын иһитиннэрдэ, итиэннэ быйыл Герой аатын сүгэр оскуолаҕа уонна интернат дьиэтигэр өрөмүөн үлэтин туруоруста.
Михаил Николаевич балта Анастасия Васильевна Готовцева мунньахха кыттан, үбүлүөйдээх сыл тэрээһиннэри тула бэйэтин санаатын үллэһиннэ. Ол курдук Танда оскуолатын базатыгар ыытыллар «Агронтика» күрэх ааспыт сылларга олус тэрээһиннээхтик, интэриэһинэйдик ыытыллыбыттарын бэлиэтээн туран, быйылгы да күрэх үрдүк таһымҥа ыытылларыгар эрэнэрин биллэрдэ, маны сэргэ «Бастыҥ ыанньыксыт» күрэхтэһии таһыма олус үрдүгүн бэлиэтээтэ, онон быйыл улууспутугар үрдүк тэрээһиннээхтик ыытарга санаатын эттэ. Маны таһынан Михаил Николаевич бэйэтин кэмигэр чэпчэки атлетикаҕа I, II разряд нуорматын толорбутун, уһуну ыстаныыга эмиэ элбэхтик күрэхтэспитин бэлиэтээн, үбүлүөйдээх ыһыахха кини сүүрэн кыайталаабыт дистанцияларыгар күрэхтэри ыытыыга санаатын үллэһиннэ уонна бары ыытыллар тэрээһиннэргэ аймаҕынан күүс-көмө буолан үбүлүөйдээх сылы үрдүк таһымҥа ыытарга ыҥырда. Ааспыт сылга гаражтара умайан үлэлиир техникалара уокка былдьаммыттарын, сүүһүнэн төбөнү аһатыыга ыарахан балаһыанньаҕа киирэ сылдьыбыттарын эттэ. Маныаха улуус дьаһалтата суһал дьаһалы ылынан, саҥа тыраахтар ылан биэрэн көмөлөспүттэригэр, ыарахан балаһыанньаттан таһаарбыттарыгар улахан махталын тиэртэ.
Мунньахха эбии этиилэр, араас боппуруостар киирбиттэрин тула киэҥ кэпсэтии таҕыста, түмүгэр Герой үбүлүөйдээх сылын үрдүк тэрээһиннээхтик ыытарга мунньах боротокуолун ылыннылар.
Улуус дьаһалтатын пресс-сулууспата