Улуус баһылыга Василий Алексеев 2026 сыл тохсунньу 12 күнүгэр “Российскай Федерация Үлэҕэ Дьоруойа Михаил Готовцев 80 сааһынан ыытыллар тэрээһиннэр” диэн 1№-дээх дьаһалын таһаарда. Ол курдук улуус тэрилтэлэрин 17 салайааччытыттан састааптаах тэрийэр хамыыһыйаны улуус баһылыгын бастакы солбуйааччы Семен Бурнашев салайыаҕа.
Үөрүүлээх үбүлүөй өрөспүүбүлүкэтээҕи тэрийэр хамыыһыйатын мунньахтарыгар уонна анал тэрээһиннэригэр улуус тэрийэр хамыыһыйата эмиэ кыттыаҕа.
Улууспутугар кулун тутар уонна муус устар ыйдарыгар РФ Үлэҕэ Дьоруойа Михаил Готовцев кыттыылаах “Үлэ Албан аатын эстафетата” диэн аатынан уопсастыбаннаһы, тыа хаһаайыстыбатынан дьарыктанар тэрээһиннээх, бааһынай хаһаайыстыбалар үлэ кэлэктииптэрин кытта көрсүһүүлэр, быыстапкалар ыытыллыахтара. От ыйыгар Байаҕантай нэһилиэгин “Удьуор” бааһынай хаһаайыстыба Убаһалаах диэн сиригэр-уотугар “2026 сыл бастыҥ ыанньыксыта” диэн улуустааҕы күрэс, “Уус Алдан улууһун 2030 сылга диэри социальнай-экономическай сайдыытын хайысхалара” диэн улуус баһылыгын уурааҕын олоххо киллэрии чэрчитинэн улуус нэһилиэктэрин баһылыктарын, ТХПК, бааһынай хаһаайыстыбаларын, соҕотуопкалыыр тэрилтэлэрин салайааччылара кыттыылаах мунньах ыытыллыаҕа.
Сыл устата Убаһалаах баазатыгар 100 төбөҕө хотон тутуутун итиэннэ гарааһы чөлүгэр түһэрии үлэлэрэ ыытыллара былааннанар.
Үлэ Дьоруойа М.Н. Готовцев аатынан Бочуоттаах бэлиэ олохтонуоҕа. Оттон улуус үөрэҕин тэрилтэлэригэр бастакы тэрээһин кулун тутарга М.Н. Готовцев аатынан Танда орто оскуолатыгар “Чугунов ааҕыылара” диэн бүтүн Россиятааҕы научнай-практическай кэмпириэнсийэ бастакы түһүмэҕэ тэриллиэҕэ. Олунньуга-кулун тутарга “Биһиги Үлэ Дьоруойун аатынан киэн туттабыт” диэн Танда орто оскуолатын үөрэнээччилэрин үөрэтэр-патриотическай десанын бырайыага олоххо киириэҕэ. Сыл устата “Уус Алдан оскуолаларыгар оҥоһуллубут” диэн брендинэн улуус агро-хайысхалаах оскуолаларын бизнес бырайыактарын куонкуруһа буолуоҕа.
Бэчээт эйгэтигэр М.Н. Готовцев туһунан кинигэни бэлэмнииргэ анал бөлөх үлэлиэҕэ, улуус, өрөспүүбүлүкэ хаһыаттарыгар сырдатыы, Герой М.Н. Готовцев туһунан документальнай киинэни устуу, электроннай библиотекаҕа киллэрии үлэлэрэ ыытыллыаҕа.
Оттон уопсастыбаннай-маассабай, культурнай тэрээһиннэргэ бэс ыйыгар Байаҕантай нэһилиэгэр үбүлүөйдээх ыһыах, оттон сэтинньигэ Бороҕоҥҥо РФ Үлэҕэ Дьоруойа Михаил Готовцев 80 сааһын бэлиэтиир уопсастыбаннас кытыылаах үөрүүлээх тэрээһин ыытыллара былааннанар.
Бэйэб. иһитинн.