Бүгүн улуус дьаһалтатын ааспыт сыллааҕы үлэтин отчуоттуур улуус баһылыга Василий Алексеев салайааччылаах бөлөх Суотту нэһилиэгэр үлэлээтэ.
Саһылыкаан бөһүөлэгэр уруккуттан ититии, суол, сибээс боппуруоһа турааччы. Быйыл иккис сибээс киирэн уонна суолларыгар куһаҕан сирдэринэн өрөмүөн оҥоһуллан сэргэхсийэн олороллор. Ол эрээри суол толору өрөмүөнүн туруорсаллар. Ону тэҥэ ититии киирэрин кэтэһэ сатаан «баттах маҥхайда» дэһэллэр. Онон бу боппуруоһу күүскэ туруордулар. Ону тэҥэ оскуола-саад тымныы күннэргэ тымныйарынан таһыттан хапытаалынай өрөмүөнү уонна бөһүөлэккэ киириигэ муостаны саҥардары баҕараллар. Итиэннэ «Саһылыкаан сиригэр чох баар, ону хостуур кэм кэллэ» дэһэллэр. Онуоха Василий Петрович бу боппуруос үөрэтиллэ сылдьарын, манна шахта үлэтэ ирдэнэринэн уустуктааҕын туһунан эттэ. Оттон туораахтаах култуураны харайар ыскылаакка өрөмүөн наадатын туһунан этиигэ тыа хаһаайыстыбатын управлениетыгар сайаапка түһэрэллэригэр сүбэлээтилэр. Итиэннэ бөһүөлэккэ таах турар икки хотону сөргүтэргэ инникитин дьаһалта ыйыытын-кэрдиитин эрэйдилэр.
Хоноҕорго
Тыын боппруоһунан 40-ча ыал олорор ыччат түөлбэтигэр ититии ситимин киллэрии буолла. Улуус дьаһалтата ханнык эмэ суолу тобулан, бу өртөн ыла турбут боппуруоһу быһаарарыгар көрдөстүлэр. Ону тэҥэ Хоноҕор – Бороҕон хайысханан суол оҥоһуллуутун, спорт саала тутуутун туруорсаллар. Сыбаалканы хомуйууга үп булунарга күүс-көмө, фельдшерскэй пуун тутуутун, сынньалаҥ киинигэр киинэ тыйаатырын, автодром үлэлииригэр, Кыһыл Кырдал пааматынньыгын сөргүтэргэ, оскуола музейын дьиэтин саҥардыыга өйөбүлү, учууталларга саҥа уопсай дьиэни тутары туруорустулар. Итиэннэ Суоттутааҕы норуодунай тыйаатыр үбүлүөйдээх сылын көрсө кинигэ тахсарыгар көмө баар буоларыгар көрдөстүлэр.
Оҕуруоттаахха
Тыа хаһаайыстыбатыгар, үөрэхтээһин тиэмэтигэр үгүс ыйытыы бэрилиннэ, улуус инники сайдыытыгар элбэх санаа этилиннэ. Бороҕон – Суотту, Суотту – Кыһыл Маяк суола оҥоһулларын, эдэр исписэлиистэр олорор дьиэлэригэр өрөмүөн үлэтин, улууска граҥҥа кыттааччыларга сүбэ-ама биэрэр ресурснай киини, ходуһалары бэрээдэктиири туруорсаллар, итиэннэ тутуллубута 65 сыл буолбут, эргэрбит тымныы кулууп дьиэтин оннугар аныгылыы дьиэни тутарга саҕалааһын үлэни ыытар уолдьаспытын эттилэр.
Бу үс бөһүөлэк олохтоохторо ааспыт сыл отчуотун, уонна отчуот кыттыылаахтарын толору эппиэттэрин биһирээтилэр, ыытыллыбыт үлэни-хамнаһы сөптөөҕүнэн сыаналаатылар.
Мария Аргунова